1 Paulo e micne bapa hone dendeŋ-jopahuc dâŋ šiŋuc jazawec: “Ŋic âgofâc-nane, no sâcmutâc dâŋ qaqatarare maŋnanezi mumu hehec moc mi enareha Anuture maio juwefuhuc jupozi jukopac.” 2 Iŋuc mume taha bapa sâko Anania eki ŋic Paulore maŋfuŋko domambiŋ jaŋe šiŋuc jazawec: “Ŋoŋe masunao qaniŋ.” 3 Mume Paulozi šiŋuc âzâcnewec: “Maŋge tâŋzi qakicne go Anutuzi guocmu. Go sâcmutâc dâŋte sâcko norao mumutiŋ gie bazo mukiczi wemocte sâcmutâc dâŋ qâsuahuc nuniŋte jazakic?” 4 Iŋuc mume ŋic doma rambiŋ jaŋe šiŋuc âzâcnembiŋ: “Go Anuture taha bapa sâko wemocte musoriŋkekic?” 5 Mupie Paulozi šiŋuc muwec: “Âgo bureŋ, e taha bapa sâko jukac i mi manahuc dâŋepac. Mitio dâŋ kecšiŋuc qâreŋkekicne: `Go micne bapa mi musâqorec-jopazemec. Ž No dâŋ i manaekopac.” 6 Eme micne guru ŋic tucne sadukaio â tucne farisaio ŋic jumbiŋ, Paulozi i manahuc dâŋ baferâ šiŋuc jazawec: “Ŋicbureŋ, no farisaio ŋic â apa ŋosafâc-nane jaŋe farisaio ŋic jaha jumbiŋ. Hâmockonec fafahare fokac dâŋ i dopeckeekopacte dâŋko râecnuŋgopieŋ.” 7 Dâŋ iŋuc mume farisaio ŋic â sadukaio ŋic jaŋe qaqatarac epie micne bapa jaŋerao fâfâuc fuawec. 8 Sadukaio ŋic jaŋe hâmockonec fafahare â aŋelo â sawa qâqâtâc, wiac iŋucne micke-fâreeŋgopieŋ. Farisaio ŋic jaŋe ine irec fârine mueŋgopieŋ. 9 Eme irec tutumaŋ-jeŋicko ojowa sâko bambiŋ. Eku farisaio ŋic jaŋere guruonec miti qaqazu gâcne faharerâ dâŋ fârone kecšiŋuc mumbiŋ: “Nâŋe ŋic kecširec kiŋ manapene aricne ekac” aŋelo me sawa qâqâtâc moczi dâŋ âzâcnewecko weniŋuc moc munaŋmu?” 10 Eme fecko fefec mâretec epie momori soŋaŋ sâko e Paulo qâsuckenšipiŋte hâwickeme mume momori jaŋe fisirâ Paulo ŋicŋondeŋkonec fâre waharâ ficjeŋicko barambiŋ. 11 Eme ŋafe ira Wofuŋzi Paulo fuacnerâ šiŋuc âzâcnewec: “Go hâbige roc, šira Jerusalem haeo mutaniŋnukomec iŋuc jaha Roma haeo mutaniŋnuzemec.”

12 Hae fureme Judaŋic gâcne šâšâfic erâ nânâ sowa jujâmbâŋkeku Paulo qarâ nânâ opâ nâniŋte mumundeŋ embiŋ. 13 Ŋic šâšâfic erâ iŋuc mumbiŋ šare-jeŋic 40 jâuruwec. 14 Ŋic jaŋe hâcne taha bapa micne â soŋaŋ jaŋerao rarâ mufua-jarerâ šiŋuc jazambiŋ: “Nâŋe nânâ sowa jujâmbâŋkeku Paulo qarâ wiac nanaŋte mumundeŋ embeneŋ” 15 irec micne bapa ŋoŋe momori soŋaŋ sâkorao dâŋ šiŋuc râepie razejec: `Go Paulo nâŋere tutumaŋko soretec wareme dâŋticne mocwâc muhâmonšepeneŋ. Ž Eme dâŋŋeŋic manarâ iŋuc eme nâŋe Paulo hatao qanaŋmu.”

16 Eme Paulo baŋec-ticnezi šikadâŋ i manawec. Manarâ momori ficko rarâ wawa-ticne âzâcnewec. 17 Âzâcneme Paulozi momori jaŋere micne moc wiracnerâ šiŋuc âzâcnewec: “Go motec ši momori soŋaŋ sâkorao jowa ratec dâŋ moc âzâcneoc.” 18 Mume ŋic eki motec soŋaŋ sâkorao jowa rarâ šiŋuc âzâcnewec: “Kâpâcwâru ŋic Paulo eki wira-narerâ nazame motec ši dâŋ gazaocte jowape warekoperec.” 19 Iŋuc muhuc âzâcneme soŋaŋ sâkozi motec menao rorâ herâricnao bararâ wiocnerâ muwec, “Dâŋ weniŋuc nazacmu?” 20 Eme moteczi šiŋuc âzâcnewec: “Judaŋic jaŋe gorao dâŋ râepie wareocte muc manac embieŋ, jaŋe go Paulo tutumaŋ-jeŋicko jowa rarâ fuŋne-ticne bataniŋke-hâmocmurâ gazaniŋmu. 21 Gazapie dâŋjeŋic mi manazemec. Ŋic šare-jeŋic 40 jâurukac, iŋuczi Paulo qâhâmoniŋte muŋgopieŋ. Jaŋe nânâ sowa jujâmbâŋkeku Paulo qarâ wiac nâniŋte mumundeŋ embieŋ, erâ biac šawierâ gore dâŋte woŋec juŋgopieŋ.” 22 Motec e dâŋ iŋuc mume soŋaŋ sâkozi šiŋuc muhuc sorewec: “Go dâŋ mufuarâ nazakomec i ŋic moc mi jazazemec.”

23 Eme soŋaŋ sâkozi momori jaŋere micne jajahec hefârec-jofarâ šiŋuc jasawec: “Ŋohe mupire momori kikezi hata rara 200 â becâsicko rara 70 â damu bapa 200 izi šawierâ ŋafere 9 kiloë ehame Kaisarea haeo ranšepieŋ. 24 Erâ Paulore becâsic moc sate hecnenšepieŋ. Eme aimuŋ soŋaŋkehuc kia Feliki erao baranšepieŋ.” 25 Iŋuc murâ kiare papia moc šiŋuc muhuc qâreŋkewec: 26 “Klaudio Lisia noni kia biaŋ-nane Feliki gore papia ši qâreŋkekopac. 27 Momori jaŋe ŋic moc bafâŋgopieŋ e Judaŋic jaŋe qazo embiŋ. Eme noni e Romaŋic jâmbâŋ ere iŋuc manahuc momori jaŋehec rarâ mejeŋickonec batarambeŋ. 28 Eme dâŋko râembiŋ irec fuŋne manapemurâ micne bapa tutumaŋ-jeŋicko barapo. 29 Bararâ sâcmutâc dâŋjeŋicte qorickepie šiŋuc manapo: Wiac ewec izi ferâ šika kâpâcwâru bâbâfuane mi ekac. 30 Eme ŋic gâcne jaŋe somâ barâ Paulo qaniŋte mupie manarâ gorao sorepe fakac hâcne. Á qorickeeŋgopieŋ ŋic i jaŋe iŋuc jaha ejarepe gorao fârâ dâŋticne gazanšepieŋ.”

31 Eme momori jaŋe soŋaŋ-jeŋicte mic reŋkehuc Paulo ŋafeoa jowa raku Antipatri haeo fisimbiŋ. 32 Hae fureme momori gâcne jaŋe ficjeŋicko risiehapie becâsicko ŋeŋe jaŋe buc Paulo jowa raku Kaisarea haeo fisimbiŋ. 33 Fisirâ kia papia râcnehuc Paulo iŋuc jaha ere meo râembiŋ. 34 Eme kiazi papia woserâ Paulo mâreŋ qizec-ticnere wiocneme muwec, “No Kilikia mâreŋkonec.” 35 Eme kiazi šiŋuc âzâcnewec: “Dâŋko râecguŋgopieŋ ŋic i jaŋe ware fisipie gore dâŋ muzo.” Iŋuc murâ momori jazame Herodere ficko râerâ soŋaŋkembiŋ.