GALATA
Galata i mâreŋ šâŋe. Mâreŋ i Asia mâreŋ masune irec dâkâne moc. Paulo e miti kiŋaŋ rame jajahec ewec dameŋ ira raku mâreŋ ira fisiwec. Eme ira huc šâic ecne-bipiehame sifu qajacnerâ miti gie bawec. Bame fârinehec ewec. Ŋic jaŋe miti-ticne manarâ maŋjeŋic bârisierâ hata raŋɋane i râpeckembiŋ. Erâ mitire bubiaŋ manarâ Paulo huc šâic-ticnere ehâmocnembiŋ. Iŋuc juhapie Paulo e behec-joparâ Airopa mâreŋko rawec. Erâ ira gie bahuc juku Jerusalem haeo risiewec. Eme šâhec miti kiŋaŋ mocwâc rahuc Galata ŋic jaŋerao fisirâ iqic-jopawec. Erâ miti sâcne bajuhapie honec-joparâ irecnec Efeso haeo rawec. Ira juhame Jerusalem haeonec Judaŋic opâ ruac jaŋe Galata ŋic jaŋerao fisirâ šiŋuc jazambiŋ: Ŋoŋe miti huŋtuc bajueŋgopieŋ. Paulo e Jesure miti sawa qazu-ŋarewec. Eme i sawa bajupie mi sâckekac. Mosere sâcmutâc dâŋ fokac, i qazu-ŋarepene manarâ mâmâc reŋkenšepieŋ. Erâ irec ma sahac-ŋeŋicko bapie fuazejec. Iŋuc muhuc jazapie ŋic gâcne jaŋere maŋ mi sifuckezejec i. Eme Judaŋic jaŋere hombaŋ burecne i fuŋkerâ ŋembiŋ (Galata 4:10). Ehuc Paulore manapie wawahane ewec.
Eme Paulo e Efeso haeo juhuc irec biŋe manarâ fâfârewec. Fâfârerâ šiŋuc muwec: Galata ŋic jaŋe Jesure bâjâpec jumbiŋzi Judaŋic jaŋere bâjâpec eŋgopieŋ. Iŋuc manarâ izia papia qâreŋkerâ râeme rawec. Dâŋ jajahec qâreŋke-jarewec. Qanaŋ e jahacnere šiŋuc qâreŋkewec: No gie baekopac i ŋiczi mâcne Wofuŋ e jahac munarewec, â miti muekopac i, iŋuc jaha ŋiczi naza qazuc mi embiŋ Wofuŋ e jahac mufua-narewec. Ehuc Petoro aposolo gie-ticne baha bafickeme fârinehec ewec iŋuc jaha no baficnume bape fârinehec jaha wâc ewec. Dâŋ i â gâcne i gaŋ 1 â 2 ira qâreŋkewec. Erâ dâŋ birine moc ine kecšiŋuc muhuc qâreŋkewec: Jesu manasiŋkehuc juju sanaŋ hotâckezo. Jesu e nâŋâcnere erâ sâwec hotâckewec, ehuc sâcmutâc dâŋko sâwec i bâsue-nârewec. Sâcmutâc dâŋ reŋkehuc kiŋ tâmiric eene mi fokac. Mârore hata âtembiŋzi wemocte wiac jawanere hatao mocwâc raŋgopieŋ. Paulo e Galata ŋic jaŋere bušâic manahuc dâŋ i â gâcne gâcne qâreŋke-jarewec. Jaŋe miti fârine jâmbâŋ beherâ Judaŋic jaŋere dâŋ jawane reŋkezo mumbiŋ irec maname busâqochec ewec. Jesu manasiŋkehuc bibiaŋke mocjaha fokac, dâŋ irec fuŋne hâcne Paulozi Roma haeonec miti mamana jaŋe wâc qâreŋke-jarewec.
Papia maŋnao dâŋ neŋgocne jahec â moc ŋehuc dâŋne murakicne i kecšiŋuc:
Gaŋ 1-2. Paulozi miti gie bahuc juwec i ŋiczi mâcne Wofuŋ e jahac mutâcnecneme bahuc juwec. Irec dâŋticne i ŋicdâŋ aricne i Wofuŋdâŋ.
Gaŋ 3-4. Sâcmutâc dâŋte hata â mamanasiŋte hata ââte irec fuŋne.
Gaŋ 5-6. Jesu e niŋgiŋkonec batarac-nâpowecte e manasiŋkehuc juju sanaŋ hotâckezo.
1
Mumušâwe â jambuŋdâŋ
1 Paulo no aposolo, ŋiczi mi sorecnumbiŋ â ŋic moczi gie wâc mi munarewec, Jesu Kristo â Anutu Mamac e hâmockonec bâɋâreweczi gie i munarewec. 2 No â âgo gâcne nohec juŋgopieŋ nâŋe kikefuŋ Galatia mâreŋko juraŋgopieŋ ŋoŋe papia ši râe-ŋareŋgopeneŋ. 3 Anutu Mamac â Wofuŋ-nâŋec Jesu Kristo eraonec aki anonoc â wama ŋoŋerao fotâcnerâ fozejec. 4 Jesu e Mamac-nâŋec Anutu ere micte juju sâqocne ši jueŋgopeneŋkonec bâhoc-nâpoocte sindaŋ-nâŋecte erâ sahac-ticne qaisockewec. 5 Irec erao mumuteŋzi mumuteŋ fohuc juzejec. Jâmbomac.
Moc e Biŋebiaŋ âke sipuhuc moc muocmu e hârâcte biŋe eocmu
6 Ŋoŋe Kristore aki anonocko râec-ŋopahuc hefârec-ŋopawec ehec jupie mi šoraha e râpeckehuc miti fuŋmoc irec hazec rârâe eŋgopieŋ, no irec wareckekopac. 7 Erâ Biŋebiaŋ fuŋmoc wena fokac? I aricne i. Mâc ŋic tucnezi maŋ bâsifuc eŋarehuc Kristore Biŋebiaŋ âke sipueŋgopieŋ, i sawa fokac. 8 Irec nâŋe wâc, me sambâŋkonec aŋelo moczi, Biŋebiaŋ ŋazakicne i âke sipuhuc moc ŋazanaŋmuo, iŋucnezi hârâcte biŋe ezejec. 9 Dâŋ mârâc mumbeŋ ijaha ši wâc mukopac: Moczi Biŋebiaŋ qazu-ŋarekicne i âke sipuhuc moc ŋazaocmu e hârâcte biŋe ezejec. 10 Eme weniŋuc, dâŋ ši mukopac i ŋiczi honecnupie biaŋkeocte me Anutuzi honecnume biaŋkeocte mukopac? No ŋic dape-jarehuc gie bazapo muzac, wemocko Kristore kiŋaŋ qaqa juzapo.
Paulo e Jahacne juju bapare dâŋ
11 Âgofâc-nane, no dâŋ ŋazape mananiŋ: Biŋebiaŋ ŋazapo i ŋickonec mâcne, 12 erâ wâc ŋiczi mi naza qazuc embiŋ, i Jesu Kristo e jahac mufua-narewec. 13 No mârâc jaha Judaŋic jaŋere guruo juhuc wiac epo, i ŋoŋe manaeŋgopieŋ. No Anuture kikefuŋfâc jopa jâpec ejarehuc mâretec sipiric-jopapo. 14 Ehuc kâcɋenefâc-nâŋec jaŋere dâŋ mi wahazejec muhuc samac qamandiŋkerâ motec âgofâc-nane siric-jopapo. 15 Eme Anutu e qanaŋ neŋgoc bumaŋko hone wosâecnurâ uruc jauŋ-ticnere erâ hefârec-nuweczi maname sâckeme 16 Ŋokâ-ticnere biŋedâŋ qâpuc jaŋerao musawepere ere fuŋne bataniŋke-narewec. Iŋuc enareme sahac biuchec jaŋe mu wioc mi ejarepo, 17 erâ wâc Jerusalem haeo mi ferâ aposolo fuŋkerâ juwarembiŋ jaŋe mi iqic-jopapo. Aricne, no Arabia mâreŋko ra juku Damasko haeo risiepo.
Paulozi Jerusalem haeo ferâ juwec
18 Juhape jara 3 tarame Kefa honepemurâ Jerusalem haeo ferâ šoaŋ gie bapa 15 ehec jupo. 19 Aposolo gâcne mi honec-jopapo, Wofuŋ ɋaticne Jakobo e sawa honepo wâc. 20 Dâŋ qâreŋkekopac i Anuture maio jâmbomac muhuc qâreŋkekopac. 21 Iŋuc erâ Siria â Kilikia mâreŋko ra jupo. 22 Á Judaia mâreŋko Kristore kikefuŋ jaŋe ine mi honecnumbiŋ. 23 Jaŋe nore biŋedâŋ šiŋuc sawa manambiŋ: “Nâpo jâpec enârehuc miti ima qaocte muweczi ŋic miti i hâcne jazahuc juekac.” 24 Iŋuc muhuc nore erâ Anutu muteŋkembiŋ.