1 Eme Sonda hae mi fure taniŋkeha Maria Madala haeoneczi šâŋeruŋko rawec. Ra fisirâ honewec: Qânâ e šâŋeruŋkonec bârâriekicne. 2 Iŋuc honerâ gasacke rarâ Simoŋ Petoro â Jesu motec bufuŋ-ticne jasarâ muwec: “Wofuŋ qâŋɋâŋ-ticne bawisembieŋ, eme wena râembieŋ i nâŋe kâuc baŋgopeneŋ.” 3 Iŋuc mume Petoro â motec âgo-ticne jahe šâŋeruŋko rapic. 4 Hatao gagasac jaha rahuc âgonezi Petoro âte tariŋkerâ biac ra fisiwec. 5 Ra fisirâ hawecmaŋko mi rašihuc mâc okarierâ fime rašime qoruc râpâ sawa fome honewec. 6 Ehame Petoro e šâhec fisirâ maŋnao raširâ qoruc râpâ honewec 7 â qizec-ticnere foŋ moc buc bazukicne fome honewec. 8 Iŋuc eme motec âgo-ticne bâbâni šâŋeruŋko fisiwec eki raširâ iŋuc jaha hone-fârerâ manapaŋkewec. 9 Juwicnao ine jahe Jesuzi hâmockonec ɋârerâ fahareocte miti papiao findaŋdâŋ fowec i mi mana tarapic. 10 Eme jahe haeo mocwâc risie rapic.

11 Eme Maria eki šâŋeruŋ sahacnao domahuc kiowec” kiohuc ra motâcko okarierâ šâŋeruŋko fime rašime 12 aŋelo jajahec ŋaqi qaŋqaŋhec Jesure qâŋɋâŋ fofotacnao ŋepire honec-jofawec, moc e qizecne fowecko â moc e kikene fowecko ŋewec. 13 Eme jahe mupic: “Ŋokac, go wemocte kiokomec?” Eme eki muwec: “Wofuŋ-nanere qâŋɋâŋ mocko bawisepie basakopac.” 14 Iŋuc murâ forisierâ Jesu jahacne honewec. Honerâ Jesu hawarine mi hone tarawec. 15 Eme Jesuzi wiocnerâ muwec: “Ŋokac, go wemocte kiokomec? Mo basakic?” Eme eki jufu runezi domakac muhuc šiŋuc âzâcnewec: “Ŋicbomboŋ-nane, goki qâŋɋâŋ mocko bara râemecko mutec manarâ ra rozepac.” 16 Eme Jesuzi muwec, “Maria.” Mume e forisierâ Judadâŋko “Rabuni” muwec, nâŋâcne dâŋko qaqazu. 17 Eme Jesuzi šiŋuc âzâcnewec: “Bâua basanaŋ mi enarec. No Mamactao miŋecnea fepemu i¡ Go rarâ qomâfâc-nane šiŋuc jazac: Nore Mamaczi ŋoŋere Mamac, â nore Anutuzi ŋoŋere Anutu, eme erao hâcne fepemu.” 18 Eme Maria Madala haeoneczi risie rarâ motecfâcne šiŋuc jazawec: “No Wofuŋ honepe dâŋ iŋuc nazajec.”

19 Eme Sonda hae ŋafeme motec jaŋe Judaŋic jaŋere hâwic-jopame tumaŋnerâ ficmotâc ki bafârerâ ŋembiŋ. Ŋehapie Jesu e ŋondeŋ-jeŋicko fuarâ domahuc jazawec: “Wama ŋoŋerao fozejec.” 20 Iŋuc murâ mejahecne â tambaraŋne jowatuwec. Eme motec jaŋe Wofuŋ honerâ bujeŋic biaŋkewec. 21 Eme harierâ jazawec: “Wama ŋoŋerao fozejec. Mamaczi no sorecnuwec iŋuc jaha noni ŋoŋe sorec-ŋopakopac.” 22 Iŋuc murâ ficnec-joparâ muwec: “Tiri Mâro ro maŋ eniŋ, 23 ŋoŋe ŋic sâqocne-jeŋic mutâmirepie tâmire-jareocmu, mi mutâmirepie fojareocmu.”

24 Motec âgo-jeŋic moc šâŋene Toma, šâŋene moc Didimo, eki mocko juhame Jesuzi fua-jarewec. 25 Eme motec âgofâcne jaŋe biŋedâŋ šiŋuc âzâcnembiŋ: “Nâŋe Wofuŋ honembeneŋ.” Iŋuc mupie muwec: “No nahac šâŋe jâmbâŋ-nanezi menao biriŋ râfu honerâ menanezi râfu bahonerâ tambaraŋne bâuarâ dâŋŋeŋic manape fârine eocmu.” 26 Sonda mocwâc fuame motec jaŋe Tomahec mâmâc ficko qâzuckerâ motâc ki bafârerâ ŋembiŋ. ŋehapie Jesu e ŋondeŋ-jeŋicko mocwâc fuarâ domahuc jazawec: “Wama ŋoŋerao fozejec.” 27 Iŋuc murâ Toma âzâcnewec: “Go memotecgezi menane bahonec â mege sicnerâ tambaraŋ-naneo râec, erâ maŋjahec mocwâc mi ehuc manasiŋnuzemec.” 28 Eme Tomazi muwec: “Go Wofuŋ-nane â Anutu-nane.” 29 Mume Jesuzi šiŋuc âzâcnewec: “Go honecnukomecte manasiŋnukomec, mi honecnuhuc manasiŋnueŋgopieŋ jaŋere manape šerine ekac.”

30 Mâsi gâcne bocjaha Jesuzi motecfâcne jaŋere šâŋe faio bawec, i papia šira mi qâreŋke-fârekicne. 31 Qâreŋkekicne mac kecši ine šiŋucte qâreŋkekicne: Ŋoŋe wose manac erâ Jesu e Kristo, Anuture ŋokâ, dâŋ i mana šakienšepieŋ, erâ e jahacne manasiŋkehuc šâŋe biŋe-ticnere erâ juju sanaŋhec enšepieŋ.