1 Jesu e mocko ra numuwec. Numuku numu-fâreme motecfâcne jaŋeraonec moczi muwec: “Wofuŋ, Johanezi motecfâcne nunumu qazu-jarewec, iŋuc jaha goki moc qazu-nârec.” 2 Mume Jesuzi šiŋuc jazawec: “Ŋoŋe numuzo murâ kecšiŋuc numunšepieŋ: Mamac gore šâŋe tiri fozejec. Ware maŋ sâc mâreŋ sâc Wofuŋ enârec. 3 Ʒoaŋ gie bapa sâc nânâ-nâŋec nârezemec. 4 Kiŋtofa-nâŋec behenârec, nâŋe iŋuc jaha ŋic jaŋere kiŋtofa beheŋgopeneŋ. Eesâicko mi râec-nâpozemec.”

5 I mutararâ moc šiŋuc šuhuckewec: “Ŋoŋeraonec moczi ŋafe šâšâŋiŋko rarâ âgo-ticne wiwickerâ šiŋuc âzâcneocmu: `Âgo-nane, go nânâ jahec â moc mac narec, 6 âgo-nane moczi hata juku norao ware fisime nânâ gumezore basakopac. Ž 7 Iŋuc mume fic runezi ficmaŋkoa fohuc muocmu, `Go guŋ wiwic wemocte enârekic, ficmotâc kine bakicne â naru motec guŋ fofâreŋgopieŋ, irec wemocko faharerâ garepemu. Ž ” 8 Jesu e iŋuc murâ muwec, “No mupe mananiŋ, fic rune e ââgore mi manacneocmuo ine mic šoɋac-ticnere sifu faharerâ wiac mukac râcneocmu. 9 Irec noni iŋuc jaha ŋifecne ŋazape mananiŋ: Numuku wiac roniŋmu, basaku fârine bâfuaniŋmu, motâcko heikepie aŋke-ŋareocmu. 10 Numuekaczi wiac roekac, basaekaczi fârine bâfuaekac, motâcko heickeekac e rocnezo. 11 Me ŋoŋeraonec mo ŋiczi ŋokâ-ticne qowire mucneme irec okacne ɋâsu râcneocmu, 12 me qâqâc hândâŋte mucneme omeqaqa râcneocmu? 13 Eme ŋoŋe ŋic hehesicne iŋucnezi naru motecfâc-ŋeŋic nânâ mafa biaŋne jare gumec eeŋgopieŋko Mamac-ŋeŋic sambâŋko e sâc moc juekaczi Tiri Mârore numucnepie sâcne mi ŋareocmu me?”

14 Ŋic moc demoŋzi ecneme nâŋguŋ ewec. Eme Jesuzi ŋic e demoŋ jâpecneme mocwâc dâŋ dâŋ ewec. Iŋuc eme ŋic jaŋe honerâ wareckembiŋ. 15 Eme gâcnezi ere šiŋuc mumbiŋ: “Demoŋ jaŋere ŋicbomboŋ Beezebulu eki neŋgoc ŋesiŋ ŋecnehame demoŋ jâpe-jareekac.” 16 Gâcne jaŋe ine hesuahuc mumbiŋ: “Go mutec sambâŋko fuŋne qaqa mâsi fuame honenaŋ.” 17 Eme eki maŋjeŋicko mana tararâ jazawec: “Mâreŋ moc ira šika kosa fuame hae sâc rârâsi efârepie tuhu fuaocmu. 18 Sataŋzia fâuckerâ Sataŋ jâpeme gie-ticne weniŋuc sanaŋkerâ foocmu? Ŋoŋe nore šiŋuc muŋgopieŋ: Beezebuluzi neŋgoc ŋecnehame demoŋ jâpe-jareekac, irec mukopac. 19 Eme no Beezebulu ere neŋgoc ŋesiŋko demoŋ jâpe-jareekopacko, ŋaŋacne motecfâc jaŋe more ŋesiŋko demoŋ jâpe-jareeŋgopieŋ? Jaŋe hâcne qoqoric-ŋeŋicte fuŋne bataniŋkeniŋmu. 20 Noni ine Anuture tâpirizi demoŋ jâpe-jareekopacko Anuture Wofuŋ qâreŋ ŋoŋerao fuakac hâcne. 21 Ŋic momorizi sându maro-ticnehec fic hae-ticne soŋaŋkeme wiac-ticne furu foocmu. 22 Ehame tâpiri sâkoheczi fisi hâporâ sându maro mamanac-ticne jâoc rorâ boreŋ mafa-ticne kâdoc qaocmu. 23 Moc e âgo mi enareocmuzi râsi enareocmu, â moc e gie-nane hone maiŋ mi eocmuzi hetâtieocmu.

24 “Demoŋzi ŋickonec wefurâ ra tuhuo miti qatarac juhuc ŋeŋe hae-ticne basaocmu. Basaku muocmu: `Ficnane beherâ warepo ijaha mocwâc risiepe. Ž 25 Murâ risierâ honeocmu: Ʒure emasaŋ erâ bâpiaŋkekicne. 26 Iŋuc fome honerâ ra demoŋ âgofâc-ticne 7, e jahacne sâc mâcne, repipicne jâmbâŋ rocjopame ware fic ijaha ŋeŋe juju eniŋmu. Eme ŋic e mârâc sâqocne juweczi šâhec sâqore-jâmbâŋkeocmu.”

27 Dâŋ iŋuc muhuc juhame ŋic ŋondeŋkonec ŋokac moczi wiwic jaha wiracnehuc muwec, “Rocgurâ moŋ gumec guwec ere manape šerine ekac.” Eme Jesuzi manarâ šiŋuc muwec: “I mukomec noni ine Anuture dâŋ manarâ bajuengopieŋ jaŋere hâcne manape šerine ekac.”

29 Ŋic bocjaha erao qaja fusepie fuŋkera dâŋ šiŋuc jazawec: “Ŋicguru hehesicne šizi fuŋne qaqa mâsire fotarieeŋgopieŋ. Erâ ŋoŋe mâsi moc mâcne, Jonarao mâsi fuawec i sawa fuame honeniŋmu. 30 Jonarao wiac fuawec izi Niniwe haeonec ŋic fuŋne qaqa mâsi ejarewec, iŋuc jaha Ŋic Fâri Wâtuŋne erao wiac fuaocmu izi ŋicguru ši ŋoŋe fuŋne qaqa mâsi eŋareocmu. 31 Juwic mâreŋkonec ŋokac wofuŋ eki mumu tara dameŋko ŋicguru ši ŋoŋehec faharerâ fuŋne-ŋeŋic ritume katucne roniŋmu. Erâ i mâc mâcne, ŋokac e Salomoraonec mamana fârine roocte mâreŋ qaŋeŋnaonec warewec” eme mananiŋ, ši fuakac e Salomore sâc sirickekac. 32 Erâ Niniwe haeonec ŋic jaŋe iŋuc jaha mumu tara dameŋko ŋicguru ši ŋoŋehec faharerâ fuŋne-ŋeŋic ritupie katucne roniŋmu. Erâ i mâc mâcne, Niniwe haeonec jaŋe Jonazi uŋ jazame manarâ maŋjeŋic bârisiembiŋ, â ši domakac e Jona sirickekac.

33 “Ŋoŋe lambe qazerâ mi soŋkeeŋgopieŋ, me kušizi mi hetutuckeeŋgopieŋ, aricne, lambe ŋeŋe-ticnao hepie fic âke tamaeme ŋic ŋoŋe honehuc feeŋgopieŋ. 34 Sahacgere lambe ine šâŋege. šâŋege biaŋne fohuc sahacge batamaecneocmu, šâŋege sâqoreme sahacgezi tiŋtuŋ qaocmu. 35 Eme maŋgao tatamac fokac izi dapâc ezacte aimuŋ soŋaŋkehuc juzemec. 36 Eme maŋ sahacge dapâc tâmiric tatamachec efâreocmuo furu jaha tamaeocmu, lambezi batamaecguekac irec sâc.”

37 Dâŋ i mutararâ juhame farisaio ŋic moczi Jesu nânâre ficticnao hefârewec. Hefâreme ficticnao ferâ izia nânâ teboo waha ŋewec. 38 I me sahac-ticne qanaŋ mi šurehuc iŋuc ewecte farisaiozi maname mi sâckewec. 39 Eme irec Wofuŋzi šiŋuc âzâcnewec: “Oi, farisaio ŋoŋe, oto râqâc-ŋeŋic šure ɋaɋackeeŋgopieŋ, maŋŋeŋicko ine nânâ mafare sasec â bâbâsifuczi fusucmakicne. 40 O ŋic mutucne ŋoŋe, wiac sasawa irec sahacne bâfuaweczi maŋne mi bâfuawec me? 41 Irec ŋoŋe maŋkonec bâmec gie bâfuanšepieŋ, eme ŋoŋerao wiac sasawa wâwânâŋ tâmiric efâreocmu. 42 Oi farisaio, ŋoŋe hâwic-ŋopazac me, ŋoŋe wiac racne, romboc, wifu, qase â iŋucne gâcne i tucne Wofuŋte biŋe qahuc râeeŋgopieŋ, ehuc ŋifecne wiac fârine, mitio mubâtiŋ â Anutu sâsâse ine mi eeŋgopieŋ. Moc reŋkehuc moc reŋkezo. 43 Oi farisaio ŋoŋe, mitificko ŋicbomboŋ ŋeŋeoa micne ŋeniŋte mueŋgopieŋ â hatao ŋic ŋokac omanezi bâfuac-ŋoparâ mu šeri eŋareniŋte irec maŋŋeŋic domaekac. 44 Oi ŋoŋe šâŋeruŋ rârâŋnekicne iŋucne, ira ŋic Jaŋe mi manahuc fainao rac warec eeŋgopieŋ.”

45 Jesu e iŋuc mume sâcmutâc mamana ŋic moczi manarâ micnao rorâ šiŋuc muwec: “Qaqazu, go dâŋ iŋuc mutec sâcmutâc mamana nâŋerao wâc qacnekac.” 46 Mume Jesuzi okacne kecšiŋuc bâtikiecnewec: “Jei, sâcmutâc mamana ŋoŋe wâc hâwic-ŋopazac, ŋoŋe tagi bâmâckerâ ŋic fai-jeŋicko râehuc ŋaŋcne metariŋ jueŋgopieŋ. 47 Jei, mimiŋnefâc-ŋeŋic jaŋe porofete jopa sipiric embiŋ i jaŋere šâŋeruŋ ericke emasaŋ eeŋgopieŋ. 48 Iŋuc ehuc mimiŋnefâc-ŋeŋic qâtec-joparâ šika-jeŋicte manapie biaŋkeekac Jaŋe jopa sipiric embiŋ â ŋoŋe ine šâŋeruŋ-jeŋicko ma âkendâŋne-jareeŋgopieŋ. 49 Irec hâcne Anuture mamana birio dâŋ moc šiŋuc fuawec: `No ŋoŋerao porofete â aposolo sorec-jopape fisipie gâcne jopa sipiric â jopa jâpec eniŋmu. 50 Eme irec mârâc jaha ŋic fufua dameŋko fuŋkerâ porofete jopahuc socjeŋic sipiricke warekicne irec kiŋ i ŋoŋerao batarazo. 51 Ʒika i mârâc jaha Aberao fuŋkerâ sueme sue qawefuku Ʒekaria e taha ufuŋko alata fuŋko qahuc qatarakicne. No jâmbomac mupe mananiŋ, šika irec kiŋ i ŋic guru ši ŋoŋerao. batarazo. 52 Jei sâcmutâc mamana, ŋoŋe miti mamana tarare ki ŋic jowac rombiŋ. Ŋaŋac motâcko mi rašimbiŋ, â ŋic ŋokac rašizo mumbiŋ i jaŋe aka hejarembiŋ.”

53 Dâŋ iŋuc murâ rahame miti qaqazu â farisaio jaŋe fuŋkerâ jume ju ecnehuc mu esâic ecnembiŋ. 54 Ehuc micnaonec dâŋ moc wahame manapie bahacnehec eme qorickeniŋte ruc sanaŋ barâ jumbiŋ.