1 Jesu e qâhâŋnerâ fime rame mafaŋiczi taha katapao moneŋ-jeŋic râepie hume honewec. 2 Ehame hozec moczi fisirâ toea jajahec sawa râeme huwec. 3 Iŋuc eme Jesuzi honerâ jazawec, “No jâmbomac ŋazape: Hozec hapetac kecizi râekac i gâcne sasawa jaŋere sâc jâurukac. 4 Gâcne jaŋe neŋgocne sâko fojarehame tucne sawa mac râembieŋ. Á hozec e hapetaczi ine focnejec sâc râe-fârerâ mâc jâmbâŋ jukac.”

5 Tucne jaŋe taha ufuŋ qânâ erineheczi â taha geroŋzi bapie kiseŋ qâseŋ kirâ fowec i honehuc mu warec epie Jesuzi jazawec, 6 “Fic honeriŋ qâriŋ ecneŋgopieŋ i boc mi ŋeocmu. Dameŋ moc maickeme râsi jaŋe heropiepie ŋetâ qâtâtieme sesucne fuarâ fozokac.” 7 Eme jaŋe mumbiŋ: “Qaqazu, mukic i wezimucko fuazokac â irec dameŋ bembeŋkeme sowi weniŋucne fuazokac?” 8 Eme Jesuzi dâŋ šiŋuc jazawec: “Maŋ bâsifuc eŋarenšipiŋte sawaŋ-ŋeŋic qahuc junšepieŋ. Ŋic bocjaha fuarâ nore šâŋe jaba bajuhuc muniŋmu: `No Kristo. Ž Á gâcnezi muniŋmu: `Dameŋ biac maickekac'. Eme ŋoŋe ŋic iŋucne jaŋere bâjâpecne mi junšepieŋ. 9 Erâ šika biŋe â râsi fânâŋ manarâ jajaŋ bibisac mi enšepieŋ. Wiac iŋucne hâcne qanaŋ fuaocte mukicne, erâ fuame sifu dameŋ biac mi taraocmu.” 10 Iŋuc murâ muwec: “Mâreŋne mâreŋne ŋic guru sâko guru pitic jaŋe rârâsi efârerâ ra qa ware qa ehuc qaqac ranšoŋgopieŋ. 11 Erâ homeŋ kâcɋene sâko samarierâ bazokac, erâ roroc â huc mimicne ra fua ware fua ezokac. Erâ sambâŋko sowi â wiac hâhâwicne fuazokac.

12 Wiac i mi fuahame jaŋe qanaŋ rocŋopaniŋmu â ŋopa jâpec eŋareniŋmu. Erâ wâc dâŋficko â kâpâcwâru ficko râec-ŋopaniŋmu â ŋicwofuŋ â kia jaŋerao bacŋopa raniŋmu, i ŋoŋe nore šâŋe bajuŋgopieŋte iŋuc eŋareniŋmu. 13 Eme ira fuŋne mumutaniŋ gie maic-ŋopaocmu. 14 Eme jaŋere maio domahuc dâŋ weniŋuc mupene sâckeocmu muhuc mana wosâc mi enšepieŋ. 15 No nahac mic â mamana baafecke-ŋarepe dâŋ mupie kisâfâc-ŋeŋic jaŋe dâŋŋeŋic bawaharâ qatara-ŋareniŋte eipieniŋmu. 16 Erâ omanezi sawa wiac mi eŋareniŋmu, neŋgoc mamac, hahac ɋa, seŋ sâme, âgo bago jaŋe wâc doc bacŋopaniŋmu. Eme ŋoŋeraonec gâcnezi šika kirâ hâmoniŋmu. 17 Eme ŋic mâmâc sasawa jaŋe šâŋe biŋe-nanere erâ ŋoŋere manapie aaricnehec eocmu. 18 Wiac iŋucne eŋarehapie noni ŋezic-ŋopape qizec susuc-ŋeŋic moc mi sifuckeocmu. 19 Dodocke tâmiric juraku juju-ŋeŋic bâfuaniŋmu.

20 Momori jaŋe fisirâ Jerusalem hae somâckepie honerâ munšepieŋ, Miti hae qizec-nâŋec tuhu eocte dameŋne maickekac à 21 Eme Judaia mâreŋko juniŋmuzi tiki mâreŋko wiserâ ranšepieŋ, â miti hae qizecko juniŋmuzi iŋuc jaha biac waha wise ranšepieŋ. 22 Dameŋ ira hâcne okacne babazu fuaocmu. ehuc mitio dâŋ mukicne i fideteŋ efâreocmu. 23 Jei, ŋokac kiwecheczi â susuonecheczi dameŋ ira weniŋuc enšoŋgopieŋ? Ŋicguru ši jaŋerao kiŋ babatara fuame bâŋeŋkerâ weaŋsicne nâniŋmu. 24 Eme râsi jaŋe ŋic gâcne šika mimicnezi jopa miziehuc gâcne mâreŋ sâc amec-jopa rapie kiŋaŋ qaqafâc-jeŋic erâ juniŋmu. Erâ qâpuc jaŋe Jerusalem haeo ima gie bahuc juhapie mâreŋ sâc ŋic qâpuc dameŋ-jeŋic hesackeocmu.

25 “Eme šâhecko šoaŋ mosa bâpiŋko wiac šâŋe furu fuazokac, â mâreŋko hâwec sirizi â temboŋzi fânâŋ sâko eme hazec furu-ŋeŋic fuazokac. 26 Erâ wâc sambâŋ qiriŋ qame tâpirine ŋeŋgoroŋkezokac. Eme ŋic jaŋe wiac fua taraocte woŋec juhuc hobu-jeŋic taŋtaŋ âeckehame nokafe tataeŋ erâ domanšoŋgopieŋ. 27 Ehame Ŋic Fâri Wâtuŋnezi karorac faio domahuc ɋuŋɋasaŋ bâric bâric-ticnehec fisime hone šâirenšoŋgopieŋ. 28 Wiac iŋucne hâcne fuame honerâ qâhâŋnerâ fie ruruckehuc šiŋuc munšepieŋ: `Roroc-nâpo dameŋ maickekac hâcne. Ž ”

29 Iŋuc murâ dâŋ suŋsuŋne moc šiŋuc šuhuckewec: “Ŋoŋe jâmiŋ â jâc gâcne gâcne honehuc fuŋne mananšepieŋ. 30 Jaŋe gitec herâ fiepie honerâ mueŋgopieŋ: `Ʒoaŋ dameŋ maickezo ekac. Ž 31 Eme wiac mukopac i fuame honerâ munšepieŋ: `Anuture uucmaŋ fua tâcnezo ekac. Ž 32 No jâmbomac ŋazape: ŋicguru ši jaŋe mi sirowehapie wiac mukicne i deŋke-fâreocmu. 33 Sambâŋ â mâreŋ jahe sirowezokopirec, â nore dâŋ ine mi sirowe-jâmbâŋkezokac.

34 “Ŋoŋe nâ areŋ ehuc wiac omanere kirâ utuckerâ juhapie maŋŋeŋic bâzickeme dameŋ sâkozi bitiŋko kiki tinac ututuŋ jâmbâŋ kicŋopazacte sawaŋ-ŋeŋic qahuc junšepieŋ. 35 Dameŋ sâko e mâreŋ sâc ŋic ŋoŋe sâcŋopa-fârerâ acmâc jaha fuaocmu. 36 Irec ŋoŋe maŋguŋ tâmiric erâ hati numuhuc juhapie wiac fuaocte mukicne izi riric-ŋopame Ŋic Fâri Wâtuŋne e fisime ere maio qiŋ herâ domanšepieŋ.”

37 Jesu e šoaŋko ŋic taha ufuŋko miti jaza qazuc ehuc juwec. Ehame hae owâeme hae beherâ Oliwa tikio ferâ ira fojujec. 38 Eme hae fure pârâckeme ŋic ŋokac sasawa jaŋe miti mume mananiŋte biac taha ufuŋko tumaŋne jumbieŋ.