Johane.
1.
Micdâŋ e fuŋnao fuŋkerâ juwarehuc juwec. Erâ Micdâŋ e juju-ticne Anuturao foha juhuc juwec. Erâ Micdâŋ e Anutu jaha wâc juwec. 
E hâcne fuŋnao Anutuhec jurâ juwarewec. 
Erâ Micdâŋ e Anuture me wâc ehuc wiac sasawa bâfua-fârewec, â wiac fuawec i e tâmiric moc mi fuawec. 
Erâ juju irec rune erâ juwec. Á juju-ticnezi ŋic tamae-jarewec. 
Eme tatamaczi dapâcko tamaeme dapâczi guriŋkeocte eipiewec. 
Ŋic moc fuarâ juwec šâŋene Johane. 
Eki tatamacte biŋedâŋ mufuame ŋic mâmâc sasawa jaŋe tatamac rune manasiŋkeniŋte Anutuzi sorewec. 
Johane e jahacne tatamac rune mi juwec, e mâc tatamac runere biŋe muwec. 
Tatamac rune ŋic mâreŋ sâc batamaec-jopaekac, eki hâcne dameŋ ira mâreŋko fuarâ juwec. 
E mâreŋko fufua i fuawec, erâ i sawa mâcne, mâreŋ i ekizia wâc bâfuawec, eme waharâ fuame mâreŋkonec ŋic jaŋe e sifu mi šâŋitambiŋ. 
E jahacne me hofao fisihame gurufâc-ticne jaŋe âgo mi ecnembiŋ. 
Á âgo ecnembiŋ jaŋe ine Anuture naru motecfâc eniŋte hata bâfua-jarewec, i šâŋe-ticne mana maŋ eeŋgopieŋ jaŋe hâcne iŋuc ejareekac. 
Jaŋe soc biucte hatao mi fuambiŋ, erâ ŋic mumupaŋte wâc mâcne, jaŋe Anuturaonec fuambiŋ. 
Eme Micdâŋ e sahac biuchec fuarâ ŋondeŋ-nâŋecko ŋeŋe juju ewec. Eme nâŋe Wofuŋ qâreŋ-ticne honepene Mamacte ŋokâ jâmbâŋ mocjaha ere Wofuŋ qâreŋ ewec hâcne. E aki anonoc kadahe â dâŋ fâri qizecne bawahawec. 
Fuŋne-ticne ine Johanezi mutaniŋkerâ hahaŋne bahuc kecšiŋuc muwec: “No ere hâcne ŋazapo, šâhec warekac e bâbâni juwec, eki no mi fuahape juwarehuc juwec hâcne.” 
Nâŋe sasawa ere rowaŋkonec miti kadahe rorâ ro ehuc jumbeŋ. 
Mose e sâcmutâc dâŋ nârewec, â Jesu Kristo eki ine aki anonoc â dâŋ fâri qizecne tahac-nâpowec. 
Anutu e ŋic moczi moc mi honewec, Ŋokâ jâmbâŋ mocjaha, Mamacte bufuŋko juekaczi ine biŋe-ticne bawaharâ mufua-nârewec. 
Jerusalem haeonec Judaŋic jaŋe taha bapa â taha ufuŋte kiŋaŋŋic sorec-jopapie Johanerao rarâ, go mo ŋic mo, muhuc wiocnepie fuŋne-ticne jazawec. 
E fuŋne-ticne mi hesoŋkehuc mutaniŋkerâ kecšiŋuc jazawec: “No Kristo aricne.” 
Mume jaŋe harierâ wiocnembiŋ, “Eme go mo, go Elia me?” Eme muwec, “No e aricne.” Eme mumbiŋ, “Go porofete-nâŋec me?” Mupie muwec, “Aricne.” 
Eme jaŋe mumbiŋ: “Wiac go mo? Sorec-nâpopie warembeneŋ, ra weniŋuc jazanaŋmu? Go gahacnere weniŋuc muekic?” 
Eme jazarâ muwec: “Porofete Jesajazi mu qâreŋ ewec, i norao sanaŋkekac. No biŋe mumu ŋic, mâreŋ tuhuo juhuc kecšiŋuc muekopac: `Wofuŋte hata bâšâweniŋ!” 
Ŋic Johanerao fisimbiŋ i jaŋe farisaio jaŋere guruonec. 
Irec mocwâc indiŋkerâ mumbiŋ: “Go Kristo aricne, â Elia aricne, â porofete aricne, eme wemocte ŋic Miti Opâ rua-jareekic?” 
Mupie Johanezi šiŋuc jazawec: “Noni ŋic opâ sawa rua-jareekopac, â ŋondeŋ-ŋeŋicko moc fuawec jukac, ŋoŋe e mi hone taraeŋgopieŋ, 
eki hâcne râpefuŋ-naneo warehuc jukac, e sâko no iŋucne maczi mafahe decnepe mi sâckeocmu.” 
Wiac i Betania haeo Jordaŋ ocniŋucnao fuawec. Ira hâcne Johanezi juhuc ŋic Miti Opâ rua-jarewec. 
Hae fureme Jesuzi Johanerao rame taicko honerâ ŋic šiŋuc jazawec: “Honeniŋ, kecocni Anuture lama, eki mâreŋ sâc ŋic sâqocne-jeŋic fainao feme âsickekac. 
Ere hâcne kecšiŋuc ŋazapo: `šâhec warekac, e bâbâni juwec, eki no mi fuahape juwarewec. Ž 
No nahac mârâc e mi hone tarapo. Israe ŋic ŋoŋe biŋe-ticne ŋazape mananiŋte hâcne fisirâ Miti Opâ fuŋkepo.” 
Johane e iŋuc murâ muwec: “No Mârozi hapâ hawario sambâŋkonec waharâ fai-ticnao herâ ŋeme honepo. 
No nahac mârâc mi hone tarahape Miti Opâre munareweczi šiŋuc nazawec: `Mâro waharâ fai-ticnao herâ ŋeme honecmu eki ŋic Tiri Mâro rua-jareocmu. Ž 
No i hâcne honepore fuŋne-ticne kecšiŋuc mupo: `Eki hâcne Anuture Ŋokâ. Ž ” 
Hae fureme Johane erâ motecfâcne jaŋeraonec jajahec mâreŋ ijaha domambiŋ. 
Domahapie Jesu e ijaha fotâcneme honerâ motec jasarâ muwec: “Honenic, Anuture lama kecocni.” 
Mume jahe dâŋ i manarâ Jesure râpefuŋko rapic. 
Rapire Jesuzi forisierâ honec-jofarâ muwec” “Ŋohe wemocte warekopirec?” Eme jahe mupic: “Rabi (nâŋâcne dâŋko: Qaqazu), go fic wena jukomec?” 
Eme šiŋuc jasawec: “Ware honenic.” Mume jahe bâjâperâ fic honerâ šoaŋ gie bapa ira juweckoa jupic. I šoaŋ otewezo eha iŋuc epic. 
Johanere dâŋ manarâ Jesu bâjâpepic moc šâŋene Anderea, Simoŋ Petoro ɋaticne. 
Eme eki biac hahac-ticne Simoŋ bâfuarâ šiŋuc âzâcnewec: “Nâhe Mesia (Kristo hâcne(c) bâfuakoperec.” 
Iŋuc murâ Jesurao jowame rapic. Eme Jesuzi honerâ muwec: “Go Simoŋ, Johanere ŋokâ, gore šâŋe Kefa mukopac” (nâŋâcne dâŋko: Haroŋaŋ). 
Hae fureme Jesu e Galilaia mâreŋko raocte šawierâ Filipo bâfuarâ âzâcnewec, “Go bâjâpecnuc.” 
Filipo e Besaida haeonec, Anderea â Petoro jahe hae irecteaŋ. 
Eme Filipozi Natanae bâfuarâ šiŋuc âzâcnewec: “Mose e sâcmutâc dâŋqâhâcko findaŋdâŋ-ticne qâreŋkewec, â porofete jaŋe wâc qâreŋkembiŋ, ŋic e hâcne bâfuaŋgopeneŋ, Jesu, Josefere ŋokâ, Nazarete haeonec.” 
Eme Natanaezi dâŋ šiŋuc bâtikiecnewec: “Nazarete haeonec wemo wiac bipinehec fuaocmu?” Mume Filipozi šiŋuc âzâcnewec: “Murâ ware honec.” 
Eme Natanaezi Jesurao ra fisime honerâ muwec, “Honeniŋ, ŋic kecizi Israe ŋic fârine, maŋticnao sioc moc mi fokac.” 
Iŋuc mume Natanaezi wiocnerâ muwec: “Go wena jupe honecnumeŋ?” Eme Jesuzi muwec, “Filipozi mi hefârecguhame nemuja fuŋko ŋetec honecgupac.” 
Mume Natanaezi šiŋuc âzâcnewec: “Qaqazu, go jâmbomac Anuture ŋokâ, Israe ŋic nâŋere ŋicwofuŋ.” 
Eme Jesuzi muwec: “Nemuja fuŋko ŋemec i mufua-garepe manasiŋnukomec, manakic, hone manac ekomec ši susucne sawa, fâri ombâŋne miŋecnea hone manac erahuc jucmu.” 
Iŋuc murâ muwec, “No jâmbomac jâmbâŋ ŋazape: Ŋoŋe sambâŋ aŋkeme Anuture aŋelofâc jaŋe Ŋic Fâri Wâtuŋne erao fec wahac epie honec-jopaniŋmu.”