KORINTI I.
11.
No Kristore hata âtehuc bâjâpeekopac, eme ŋoŋe iŋuc jaha nore hata âtehuc bâjâpecnunšepieŋ. 
Ŋoŋe wiac ebac epo Irec manasu-fârehuc mumutâc dâŋnanere sâcko jueŋgopieŋ, irec manape biaŋkekac. 
Eme ši moc mupe mananiŋ, Kristo e ŋicte kâcɋene, ŋic e ŋokacte kâcɋene, Anutu e Kristore kâcɋene. 
Ŋic moc e qârufac rojuhuc numuocmu me Anuture micdâŋ mufuaocmu, e kâcɋene-ticne mimi qaqa ecneocmu. 
Á ŋokac moczi qârufac tâmiric juhuc numuocmu me Anuture micdâŋ mufuaocmu, e iŋuc jaha kâcɋene-ticne mimi qaqa ecneocmu, erâ ŋokac kosa jujune qizec-jeŋic rokicne jaŋehec sâc mocjaha eocmu. 
Irec ŋokac moc qârufac tâmiric jume qizec rocnezo. Me ŋokac moc e irec mimierâ qizec susuc-ticne sakareocmuzi qârufac rojuzejec. 
Ŋic e ine qizectuc juzejec. E Anuture hawari â Anuture eri tofa bakicne irec. Ŋokac e ine ŋicte eri tofa bakicne. 
Ŋic e ŋokactaonec mi rokicne, ŋokaczi ŋictaonec rokicne. 
Ŋic e ŋokacte erâ mi bâfuakicne, ŋokac e ine ŋicte erâ bâfuakicne. 
Ŋokac e ŋicte wahamicne jukacte irec ma moc qârufac hâcne rojuzejec, mâc jume aŋelo jaŋe honepie sâqorezacte. 
Erâ sifu ŋic e mocbuc-ticne juju â ŋokac e mocbuc-ticne juju i Wofuŋte maio mi fokac. 
Ŋokac e ŋictaonec rokicne, iŋuc wâc ŋiczi ŋokackonec fua sawec eeŋgopeneŋ. Erâ wiac i sasawa Anuturaonec. 
Ŋoŋe ŋaŋac mana honeniŋ, ŋokac moc qârufac tâmiric juhuc Anutu numucneme sâckeocmu me? 
Á ŋic moc e qizec susuc šoricne rojume iŋuc jaha honepie mi sâckeocmu, irec fuŋne mârâc miti tâmiric juhuc wâc manambiŋ. 
Á ŋokac moc qizec susuc šoricne rojume e ine honepie biaŋkeocmu. Qizec susuc šoricnezi qârufac-ticne eekac. 
Moc e dâŋ ši qâsuazo murâ šiŋuc manazejec: Mâsi i nâŋe â Anuture kikefuŋ gâcne mi bajueŋgopeneŋ. 
Wiac moc ši ine mana-ŋarepe bahacnehec eha uŋ sawaŋ eŋarehuc mupe: Ŋoŋe tumaŋnehuc maŋ biaŋ qaqac mi ehuc maŋ bâbâsâqorec eeŋgopieŋ. 
Erâ mitire tumaŋnepie ŋondeŋ-ŋeŋicko fâfâuc fuaekac, iŋuc nazapie manape jâmbomac tinac ekac. 
Erâ fâfâuc i mâc mâcne, ŋoŋeraonec wenizi mitio sanaŋkeŋgopieŋ jaŋe fua tâcneniŋte hâcne fuakac. 
Eme ŋoŋe Wofuŋte Tiwâ nâniŋte tumaŋnerâ hesifuckeeŋgopieŋ. 
Ŋaŋacne nânâ bafisirâ boki mi bahuc fâro erâ buc buc nâpie moc e hâmoekac â moc e gapecmâc nâekac. 
Hâc, ŋaŋacne fic basahuc iŋuc eeŋgopieŋ me? Ŋoŋe nânâ opâ nâzo murâ ira nanšapiŋ¡ Wemocte Anuture gurufâc jaŋere manapie wawahane eme hapetac busâqoc ejareeŋgopieŋ? Wemo ŋazape? Mumbiaŋ-ŋopape? Wiac kecirec mi mumbiaŋ-ŋopazo. 
No Wofuŋtaonec hâcne ropo i ŋarepo wâc. Ine šiŋuc: Wofuŋ Jesu e Judazi doc bawec ŋafe ira poroŋ rorâ 
daŋge murâ bazurâ muwec: “Kecši fâri-nane, ŋoŋere due bahuc qikiŋnekicne. Nore manasuhuc iŋuc nâhuc junšepieŋ.” 
Poroŋ nâpie waiŋ râqâc iŋuc jaha rorâ šiŋuc muwec: “Râqâc kecšira šâšâfic ɋâricnere socnane ŋekac. Nâniŋmu sâc nore manasuhuc iŋuc nâhuc junšepieŋ. 
Ŋoŋe poroŋ â waiŋ i nâniŋmu sâc Wofuŋ hâmoc biŋe-ticne mutaniŋkehuc juhapie risieocmu. 
Irec moc e poroŋ â Wofuŋte waiŋ i enšaŋauc ecnehuc nâocmu, e Wofuŋ fâri â socticne nâsifuckeme kiŋnehec eocmu. 
Irec moc e poroŋ â waiŋ nâzo murâ qanaŋ maŋticnere fuŋne hone manac ehuc bajaŋgeŋkerâ nâzejec. 
Moc e Wofuŋte fâri hone šâŋitac mi ehuc nâocmuzi kiŋticne nâfuaocmu. 
Ŋoŋe iŋuc hâcne eeŋgopieŋte huc dodoc â huc šâic boc eŋareekac, â gâcnezi biac hâmocko foŋgopieŋ. 
Nâŋâc nâŋâc fuŋne-nâŋec bataniŋkenšapeŋ muzac, Wofuŋzi mi bataniŋkezac. 
Qâoma epene ine Wofuŋzi fuŋne-nâŋec bataniŋkehuc bâtiŋ-nâpoocmu, miti tâmiric jaŋehec juku behec-nâpome sipirickenšipeŋte iŋuc hâcne enâreocmu. 
Âgofâc-nane, ŋoŋe tiwâ wirec nâniŋte tumaŋnerâ woŋec ŋehapie fisi-fârepie fuŋkenšepieŋ. 
Moc e nânâre boc ecneme qanaŋ e jahacne ficko nâzejec, tutumaŋ bâbâsifucne epie okacne fua-ŋarezacte. Dâŋ gâcne i no nahac fârâ mutâcne-ŋarepemu.