Filipi.
1.
Paulo â Timoteo, Jesu Kristore kiŋaŋ qaqa, nâhe Filipi haeonec Kristo Jesure mitiŋic ŋokac â soŋaŋ babafic ŋoŋere papia ši râekoperec. 
Mamac-nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec. 
No ŋoŋere manasuhuc Sâc Anutu-nane daŋge âzâcneekopac. 
Ŋoŋe Biŋebiaŋ manahuc izia nâŋehec qâturerâ giene bawarehuc jumbiŋ, 
eme irec numuekopac sâc mâmâc-ŋeŋicte bubiaŋ manahuc Wofuŋ daŋge numumu ecneekopac. 
Erâ šiŋuc manapaŋkekopac, gie biaŋ ŋoŋerao fuŋkeweczi baku bataraha Jesu Kristo fifisi dameŋ-ticne maickezokac. 
No ŋoŋe sasawa iŋuc mana-ŋarekopac i fuŋne šiŋucte sâckekac: No šira kâpâcwâru ficko Biŋebiaŋte erâ dâŋgie bahuc feŋeŋ râecnepe ŋoŋe sasawa baficnuhuc ŋesiŋ ŋenareeŋgopieŋ” eme no irec hâcne maŋnanezi šâfic-ŋopaekopac. 
Jesu Kristozi maŋjauŋ enâreekac ira hesiŋnehuc no ŋoŋere erâ maŋhâhâŋ boc enareekac, i Anutuzi manaha jâmbomac mukopac. 
Erâ maŋjauŋ-ŋeŋiczi maŋ mamanasu â mamana wosâc-ŋeŋic bâsoka raocte numuhuc juekopac. 
Eme ŋoŋe wiac fâri wâmbuŋne hone šâŋitac erâ Kristo fifisi-ticnere manasuhuc maŋtaniŋ â bahacmâc junšepieŋ, 
ehuc Jesu Kristozi hume keteŋ eŋareme mitire fârine mâririhec bâfuapie Anuture šeri mumuteŋ ezejec. 
Âgofâc-nane, kâuc banšipiŋte ŋazape, no šira wiac fua-narewec izi Biŋebiaŋ hatacke hâmoocte fuawec. 
No Kristore erâ kâpâcwâru ŋic epo, dâŋ izi šira kia â momori â ŋic gâcne jaŋere hazecko hufârewec. 
Eme kâpâcwâruo ŋehape širecnec âgofâc-nâŋec gâcne sâko jaŋe Wofuŋte manasuhuc afeckerâ Anuture dâŋ hâhâwic tâmiric mueŋgopieŋ. 
Tucne Kristore miti i iiŋguuŋko â hehefaricko mueŋgopieŋ, â tucnezi ine buurucko mueŋgopieŋ. 
I jaŋe mueŋgopieŋ ine no šira fohuc Biŋebiaŋ ŋezickeekopac irec maŋjauŋ enarehuc mueŋgopieŋ, 
â gâcnezi ine sioc ehuc iiriacko Kristore šâŋe muromackeeŋgopieŋ, i kâpâcwâru-nanere faio bušâic bâfua-nareniŋte eeŋgopieŋ. 
Erâ iŋuc me iŋuc, miti qâtiŋ ehuc muniŋmu me jâmbomacko muniŋmu irec wemocte boc muzo, mâc Kristore dâŋzi haŋ baocmu izi fârine, eme i fuakacte bunane biaŋkekac. 
Erâ šiŋuc muhuc bubiaŋ hati jupemu: Ŋoŋe nore erâ nunumu gie bapie Jesu Kristore Mârozi baficnume wiac kecšizi bubiaŋ bâfua-nareocmu. 
Erâ mimi mi bâfuapemu, i manapaŋkepe šickeha maŋzi worickehuc jupemu. Ewarepo iŋuc erapemu, jujure me hâhâmore sahac-nane maŋafec jaha Kristo qikiŋnecnepe izi mumuteŋ-ticne ezejec. 
Kristozi juju-nane ekac â hâmoczi wiac fekicne bâfua-nareocmu. 
Me mâreŋko šuhuckerâ jupemu, ine giere fârine mocwâc bâfuapemu. Irec wenimoire afeckepe muhuc maŋguru ekopac. 
No mocte â mocte mâmâc enarekac. Mâreŋ beherâ Kristo bâfuarâ ehec juju irec aŋacnukac, izi hâcne wiac fekicne. 
Á ŋoŋe bekâ enšipiŋte ine ŋoŋere erâ mâreŋko mocwâc šuhuckerâ jupe sâckeocmu. 
Eme irec hâcne šiŋuc manapaŋkekopac: No mi hâhâmo ŋoŋehec jupemu, erâ bafic-ŋopape mamanasiŋ-ŋeŋic ɋârâŋkeme bubiaŋhec junšepieŋ. 
Á ŋoŋerao mocwâc fârâ jupe nore erâ Jesu Kristo muteŋkeeŋgopieŋzi hati erâ muteŋkenšepieŋ. 
Mocjaha, ŋoŋe kikefuŋte maio Kristore furu Biŋebiaŋ irec sâcko junšepieŋ. Erâ maŋ mocjaha ehuc šâšâfic erâ keketeŋ domahuc Biŋebiaŋte juju gie bapie fârâ honec-ŋopazepac, me taicko juhuc biŋe-ŋeŋic manazepac. 
Keketeŋ epie kisâfâc-ŋeŋic hâhâwic heŋarepie hâbi-ŋeŋic mi goroŋkezejec. Iŋuc epie Anutuzi jaŋe behec-jopaocmu â ŋoŋe rocŋopaocmu irec fuŋne bataniŋkeocmu. 
Anutuzi Kristo wiac ecneniŋte mana-ŋarewec i manasiŋkeniŋte sawa mâcne, ere erâ šâic fâro faio juniŋte mâmâc mana-ŋarewec. 
Eme no mârâcko juju gie bape honecnumbiŋ â šiŋuczia bape biŋene manaeŋgopieŋ, juju gie ijaha ŋoŋe baeŋgopieŋ.