HEBIRAIO.
2.
Irec nâŋâc ma bâtirinšipeŋte dâŋ manambeŋ i mocwâc paŋšâic mana sakac enšepeneŋ. 
Aŋelo mickonec dâŋ mukicne i mupaŋkekicne, eme huhucke â qaqatara fuame okacnehec ejujec, 
izi wemocko bâbâpiaŋ dâŋ fekicne qikiŋnepene okacmâc foocmu? I Wofuŋ e jahac qanaŋ mufuawec, eme hazec fâri-jeŋiczi manambiŋ jaŋe muwarekupie sanaŋke-nârewec. 
Ehame Anutu e jahac wâc mâsi â tâpiri wiac šâŋe furu bâfuahuc dâŋ i dopeckehuc Tiri Mârore taha biaŋ manawec sâc kâdoc qajarehuc feŋeŋ râecnewec. 
Hae mâreŋ šâhec fuaocmu, dâŋne muŋgopeneŋ hâcne, i Anutuzi aŋelo jaŋe guriŋne baniŋte mi muwec. 
Mitiŋic moczi irec dâŋ mutaniŋkewec ine šiŋuc: “Go ŋic e wemomac-ticnere manasucneekic, â ŋicte ɋâric e wemo-ticnere hone maiŋ ecneekic? 
Go dameŋ ŋondeŋ bembeŋne mac aŋelo jaŋere wahamicnao juocte mucnemeŋ, go tatamac â šâŋe biŋezi erickemeŋ, 
ehuc wiac sasawa kike-ticnere rurumaŋko râemeŋ.” Anutu e wiac sasawa ŋicte rurumaŋko râewec, i bâtâc mi bahuc wiac furu jaha qikiŋnecne-fârewec ekac. Dameŋ šiŋuczia ine wiac šeŋgoma ŋicte rurumaŋko guruckekicne i mi honeeŋgopeneŋ. 
Jesu ine honeŋgopeneŋ, e dameŋ ŋondeŋ bembeŋne mac aŋelo jaŋere wahamicne juhuc hâmocte šâic manawecte tatamac â šâŋe biŋe tahackekicne hâporâ jukac. E Anutuzi aki anonoc enâreocte mume hâmoc hâtâne ŋic sasawa nâŋâcnere erâ manawec hâcne. 
Wiac sasawa irec rune â bâbâfua e naru motecfâcne bocjaha eri tatamac-ticnao jowac-jopaocte manasuhuc bâbâpiaŋ-jeŋicte micne bapa e šâic serereŋ gie baku mao fisiocte mucnewec i sâcke-hâmowec. 
Eme maŋfuru bacjopakac e mecne â furu bacjopakicne jaŋe mecne Mamac-jeŋic mocjaha, irec ɋafâc-nane mujareocte maname mi quŋkeekac. 
Dâŋticne šiŋuc hâcne fokac: “No šâŋe biŋege ɋafâc-nane muromacke-jarepe, kikefuŋ guruo šeri mumuteŋ egarepe.” 
Erâ moc šiŋuc: “No erao roweckehuc jupemu.” Erâ moc šiŋuc: “Ʒi no erâ Anutuzi ɋie guru narewec nâŋe mâmâc juŋgopeneŋ.” 
Eme ɋie jaŋe sahac biuchec sasawa jueŋgopieŋte eki ijaha wâc rowec. I e jahacne hâmoczi hâmoc rune Sataŋ hâcne tâpiri-ticne qame goroŋkewecte, 
erâ wâc hâmocte hâhâwiczi niŋgiŋ-jopame dameŋ-jeŋic sâc kâpâcwâru ficko ŋejumbieŋ jaŋe batarac-jopaocte iŋuc ewec. 
Wiac i aŋelo kime dopec mi ejareekac i, e Abrahamte ɋâricfâc nâŋâc kime dopec enâreekac. 
Eme irec hâcne ɋafâc-ticne jaŋehec sâc mocjaha jâmbâŋ eocte mucnekicne, hatane gâcne moc mi fowec. I taha bapa sâko urucne â hazec hâricne erâ Anuture maio taha gie bahuc ŋic ŋokac nâŋâcne sâqocne šure tâmireocte iŋuc ewec jukac hâcne. 
E jahac šâic manahuc eesâicko rašiwecte ŋic eesâic fua-nâreha sâcne bafic-nâpoekac.