BARARUŊ.
9.
Eme aŋelo namba 5 eki qeŋ qawec. Eme noni bâpiŋ moc sambâŋkonec tararâ mâreŋko wahame honepo. E hârâcte tapa roocte irec ki râcnekicne. 
Eme hârâcte tapa rome hosâc sâko wefuwec, gie šame hosâc feekac, irec sâc hosâc wefu ferâ šoaŋ â sawa sâocke-fârewec. 
Hosâc maŋkonec ine ɋirikiŋ wefurâ mâreŋko wahambiŋ. Micjeŋic ine omeqaqare Sâc. 
Erâ jaŋe mâreŋko sopâc nânâ kise me jâcrehac wiac râsi ecneniŋte mi mukicne, ŋic Anuture maqâreŋ mai-jeŋicko mi fowec, jaŋe sawa râsi ejareniŋte mukicne. 
Erâ jopapie hâmoniŋte mâcne, mâc mosa 5 kišâic-jopahuc juniŋte mukicne. Ʒâic ine omeqaqare micte sâc iŋuc manazo. 
Eme dameŋ ira ŋic jaŋe hâmoniŋte biŋe muniŋmu erâ mi hâmoniŋmu, hâmoc hefâre-bipiepie sifu mi maic-jopaocmu. 
Ɋirikiŋ jaŋe ine becâsic hawari, momori jaŋe šikao raniŋte becâsic wiac bâmocke-jareeŋgopieŋ hawari iŋucne hâcne. Qizec-jeŋicko du golzi bakicne tinac ŋewec, šâŋe mai-jeŋic ŋic šâŋe mai tinac. 
Kanšaŋ-jeŋic šoricne, ŋokac qizec gere-jeŋicte sâc. Micjeŋic laioŋte mic iŋucne. 
Amec-jeŋicko maro wapazi bakicne tinac fowec. Fakec fânâŋ-jeŋic ine keretac fânâŋ iŋucne, becâsic bocjaha jaŋe šikao raniŋte keretac gagasac jaha fâre rapie fânâŋkeekac, iŋucne tinac hâcne. 
Gecjeŋic omeqaqare gec iŋucne Micjeŋic i gecjeŋicko hâcne fokac, izi ŋic mosa 5 kišâic-jopahuc juniŋmu. 
Erâ hârâckonec aŋelo e ŋicwofuŋ jujarekac, šâŋene Judaŋic jaŋere dâŋko Abadoŋ â Grikŋic jaŋere dâŋko Apolioŋ. ª 
Tucwipezi jei jahec â moc wirawec, moc omaekac, ši jajahec fokopirec. Aŋelo namba 6 eki qeŋ qame momori guru hâhâwicne fuambiŋ 
Eme aŋelo namba 6 eki qeŋ qawec. Eme alata golzi bakicne, Anuture maio ŋekac, masune 4, 
irecnec dâŋ wefurâ aŋelo namba 6 qeŋ badomawec e šiŋuc âzâcnewec: “Eufrata opâ sâkoo aŋelo 4 niŋgiŋ-jopakicne jaŋe bâŋgoroŋ-jopac.” 
Eme aŋelo 4 jaŋe jara, mosa, šoaŋ, aua maickeme mâreŋ sâc ŋic tucne qâmiziec-jopaniŋte woŋec jumbiŋ, jaŋe hâcne firuec-jopawec. 
Eme momorifâc-jeŋic becâsicko ŋeŋe jaŋere šare 200 million, iŋuc mupie manapo. 
Ŋic â becâsic jaŋere hawari ine maŋ šâŋe-nanezi kecšiŋuc honepo: Ŋic jaŋe maruku bâbâroŋ â keda â bâbâŋeŋ iŋuc rojumbiŋ, â becâsic jaŋere qizec laioŋ qizecne iŋucne, micjeŋickonec ine šoc â hosâc â tepe šocne wahawec. 
Eme wiac fârone jahec â moc izi ŋic gâcne sipiric-jopa-fârewec, becâsic mickonec šoc â hosâc â tepe šocne wahawec izi hâcne. 
Becâsic tâpiri-jeŋic ine micjeŋicko â gecjeŋicko fowec. Gecjeŋic homa iŋucne, qizecnehec, izi hâcne ŋic sipiric-jopaeŋgopieŋ. 
Eme ŋic tucne hâmo sipiric ehapie tucne akic-jopakicne jaŋe maŋjeŋic mi bârisiembiŋ â juju bapa-jeŋicte manapie mi sâqorewec. Aricne, jaŋe sifu demoŋ wiac bajumbiŋ. Á nemuɋâŋ golzi â siliwazi â aeŋzi â qânâzi â jâczi bakicne, hone manac eene tâmiric â rarac wawarecne tâmiric, i numu-jarehuc jumbiŋ. 
Ehuc šika â qaŋgec â sasec â fiuc i mi behembiŋ.