1 Ma David i ga patuana ma i ga laun vao; ma i ga vaki Solomon natuna pi na king ure Israel.

2 Ma i ga oro varurue ra umana luluai Israel, varurung ma ra umana tena tinabar ma ra tarai Levi. 3 Ma di ga luk ra tarai Levi par ba i ga utul a vinun kadia kilala ba i ga bolo ra utul a vinun; ma ra niluluk i ga utul a vinun ma lavutul na arip na marmar na tutana. 4 Ma di ga tibe a ura vinun ma a ivat na arip na marmar upi diat a balaure ra papalum ta ra kuba i ra Luluai, ma laptikai na arip na marmar ure ra papalum na raprap ma ra papalum na tena varkurai, 5 ma a ivat na arip na marmar upi diat a umana tena varbalaurai na mataniolo, ma ra ivat na arip na marmar upi diat a pite pa ra Luluai ta nam ra umana magit na kakailai nina David i ga pait ia ure ra pite varpa.

6 Ma David i ga tibe diat ta ra utul a tiniba varogop ma ra utul a natu i Levi. Gerson, Koat, ma Merari. 7 Ta ra apik na tarai Gerson, Ladan ma Simei. 8 A utul a natu i Ladan: Iekiel i lualua, Setam, ma Ioel. 9 A utul a natu i Simei: Selomot, Kasiel, ma Karan. Go diat a umana lualua ta ra apik na tarai kai Ladan. 10 Ma ra umana natu i Simei: Iakat, Sina, Ieus, ma Beria. Go diat a ivat na natu i Simei. 11 Ma Iakat ia ra lualua, ma Sina ia ra vauruana; ma tago pa i ga peal ra umana natu i Ieus ma Beria, di ga luk diat ba a kopono apik na tarai ka.

12 A ivat na natu i Koat: Amram, Isar, Kebron, ma Usiel. 13 A ura natu i Amram: Aron ma Moses; ma di ga tibe vaire Aron upi na vagomgom ra umana magit dia gomgom kakit, diat ma ra umana natuna pa na mutu, upi diat a tun ra bulit i ang na katkat ta ra luaina mata i ra Luluai, ma upi diat a kudakudar tana, ma upi diat a pite pa ra iangina vatikai namur. 14 Ma ure Moses ra tutana kai God, di ga luk ra umana natuna varurung ma ra vuna tarai Levi. 15 A ura natu i Moses: Gersom ma Elieser. 16 Sebuel, a natu i Gersom, ia ra lualua. 17 Rekabia, a natu i Elieser, ia ra lualua. Elieser pa i ga vangala ta bul tutana mulai, ia kaka ra umana natu i Rekabia dia ga peal. 18 Selomit, a natu i Isar, ia ra lualua. 19 A umana natu i Kebron: Ieria ra lualua, Amaria ra vauruana, Iakasiel ra vautuluna, ma Iekameam ra vaivatina. 20 A ura natu i Usiel: Mika ra lualua, ma Isia ra vauruana.

21 A ura natu i Merari: Mali ma Musi. A ura natu i Mali: Eleasar ma Kis. 22 Ma Eleasar i ga mat, ma pa i ga vangala ta bul tutana, a umana bul vavina ka; ma ra umana tai diat a umana natu i Kis dia ga taule diat. 23 A utul a natu i Musi: Mali, Eder, ma Ieremot.

24 Go diat a umana bul mur tai Levi ta ra umana apik na tarai kai ra lavur tama i diat, a umana lualua na apik na tarai ta diat di ga luk diat, nina dia ga pait ra papalum ta ra kuba i ra Luluai, diat i ga ura vinun kadia kilala ba i ga bolo ra ura vinun.

25 Tago David i ga biti: Ra Luluai ra God kai Israel i ga tul tar ra malmal pire kana tarai, ma i ki Ierusalem pa na mutu; 26 a tarai Levi pa diat a puak mule ra pal na varbarat ma ra umana la ure ra papalum tana. 27 Tago ta ra mutuai kana nilaun David i ga vartuluai ba da. luk ra umana bul mur tai Levi, diat i ura vinun kadia kilala ba i bolo ra ura vinun. 28 Kadia tiniba pi diat a torom ta ra umana bul mur tai Aron ta ra papalum ta ra bala na pal i gomgom kai ra Luluai, ma ta ra bala na gunan, ma ta ra umana bagialar, ma ta ra varvagomgom ta ra umana magit dia gomgom, maia pa, ra papalum ta ra kuba i God; 29 dia ga varvakai bula ma ra gem na ginigira, ma ra bo na plaua ure ra tinabar na vuai na uma, nina ba pa i leven. ba nina di tun ia ta ra rararangai, ba nam di puk ia, ma ure ra umana valavalar na mamat ma ra umana la na valavalar. 30 Ma ta ra malamalana diat a tur ma diat a tul tar ra pite varpa tadav ra Luluai, ma damana ta ra ravravian; 31 ma diat a tul tar ra umana tinabar di tuntun tar ia tadav ra Luluai, ta ra umana Bung Sabat, ma ra umana kalamana gai, ma ra umana enana bung na lukara nina di ga kubu diat, varogop ma ra varkurai ure ra niluluk i diat, ta ra luaina mata i ra Luluai vatikai. 32 Damana diat a balaure ra pal na varbarat, ma ra pakana i gomgom, ma diat a toratorom ta ra umana tura i diat a umana bul mur tai Aron ba dia pait kadia papalum ta ra kuba i ra Luluai.