1 A tung i ki, nina di kal ra silva tana,

Ma ra pakana ure ra goled di vagomgom ia tana.

2 A palariam di kap pa ia ta ra bala na pia,

Ma ra palariam gobol di tuntun vapolo pa ia kan ra vat.

3 A tarai dia uvia pa ra bobotoi,

Ma dia tikatikan ara iat

Upi ra umana vat ta ra ngala na bingnimuna.

4 Dia kal ra tung ta ra pakana vailik kan ra tarai;

A umana tena vinavana dia nuk vue diat;

Dia taba ta ra vinau ura ta ra bala na tung, ma dia kokokolil.

5 A nian i vana rikai ta ra pia;

Ma ara iat di pelegi ra umana vat ma ra iap.

6 A umana sapir dia ki ta ra umana vat,

Ma dia kap pa ra umana pakana goled.

7 A minigulai pa i nunure ra nga tadav ia,

Ma ra kiau na mata i ra taragau pa i na tadav ia.

8 A umana leing pa dia ga rua ia,

Ma ra dekdek na leon pa i bolo tana.

9 A limana i ongor ta ra dekdek na vat,

Ma i pukue vue ra umana lualuana.

10 I kal ra umana niiga ta ra umana vat,

Ma ra kiau na matana i na tadav ra magit i ngatngat.

11 I tur bat ra umana tava upi koko diat a nininim rikai,

Ma i kap vaarike ra magit i ga ki ivai tadav ra kapa.

12 Di tadav ra kabinana ave?

Ma akave ra gunan a minatoto i tavua tana?

13 A tarai pa dia nunure ra nga tadav ia,

Ma ta go ra nilaun pa ta tikai i tikan tadav ia.

14 Ra lamanana i biti: Pa i bang ati;

Ma ra ta i biti: Pa i ki tagu.

15 Pa da kul pa ia ma ra goled,

Ma pa da valar ra mataina ma ra silva.

16 A goled maro Opir pa i topa ia pi da kul ia me,

Ma ra ngatngat na beril ma ra sapir bula, pata.

17 A goled ma ra glas pa dir boina tana,

Ma pa di varkiane ma ra umana marmar na goled.

18 A raga ma ra kristal, pa da vatang dir ure;

Maia, a kabinana i manga ngatngat ta dir ma ra kiau na kalagi.

19 A topas maro Etiopia pa i boina tana,

Pa ta goled i manga mamat da kul ia me.

20 A kabinana i arikai mamave?

Ma akave ra gunan a minatoto i tavua tana?

21 Di ive kan ra mata i ra umana launa,

Ma ra umana beo liuliu pa dia na tadav ia.

22 A tavul a vinirua ma ra minat dir biti:

Amir valongore ke ra varvai ure.

23 God i nunure ra nga tana,

Ia kaka i nunure ra gunan i ki tana.

24 Tago i gire tuk ra lavur langun ta ra rakarakan a gunagunan,

Ma i matoto ure ra gunagunan par ta ra vavai na bakut.

25 Ba i ga kure value ra dekdek i ra vuvu,

Ma i ga valar bula ra ta;

26 Ba i ga vatur ra umana varkurai ure ra bata,

Ma i ga pait ra nga ure ra meme;

27 Ta nam ra e i ga gire ma i ga vaarike;

I ga vatur ia, ma i ga valar ot pa ia.

28 Ma i ga biti tai ra tarai:

Ea, ba di ru ra Luluai, ia ra kabinana nam;

Ba di lop kan ra varpiam, ia ra minatoto nam.