1 Ma go ra umana barmana dia kulume iau,

A umana natu i diat nina pa dia ga ko

Pi bea diat a ki varurung ma ra umana pap ta kaugu kikil na sip.

2 Maia, a dekdek i ra lima i diat na topa ra ava ure iau?

Go diat nina ra dekdek i diat i ga panie.

3 Dia palaur ta ra niiba ma ta ra mulmulum,

Ma dia nganga ra pia aro ta ra bil;

4 Dia rubat ra ta aro ra pui,

Ma ra okor i ra nokanoko ure ra marua i diat.

5 Di korot vue diat kan ra mata i ra tarai;

Dia vakaunga murmur diat da ure ra tena nilong.

6 Dia ki ta ra umana male dia marungrung,

Ma ta ra umana tung ma ta ra umana babang.

7 Dia kukukula ta ra pui;

Dia va varurung ta ra vavai na kalang.

8 Diat a umana natu i ra umana lunga, maia, a umana natu i ra umana tutana vakuku,

Ma di ga korot vue diat kan ra gunan.

9 Ma go dia pite iau ta kadia kakailai,

Ma iau da ra tinata na varvaula livuan ta diat.

10 Dia milikuane iau, dia turtur irai kan iau,

Ma dia gami ra pal a matagu.

11 Tago God i ga pala ra kuara iau vi pit me, ma i ga varuva iau,

Dia papait vakuku ta ra luaina matagu.

12 A tarai vakuku dia tut ta ra papar a limagu tuna,

Dia korokorot iau,

Ma dia vatur ra umana magit upi ina virua tana.

13 Dia vakaina kaugu nga,

Ma pa ta tikai i tur bat diat,

Ba dia ongor upi ina virua.

14 Dia olo da ta ra ngala na mata;

Dia vila olo tadav iau ta ra liplip i tarede.

15 Damana a umana magit na bunurut dia tadav iau;

Dia vu vue kaugu minamar,

Ma kaugu bo na kini i panie da ra bakut.

16 Ma go ra balagu i mamat ma ra tinabun,

Ma ra umana bung na varmonong dia kinim vake iau.

17 Ta ra bung na marum di go ra umana urugu,

Ma ra kinadik tagu pa i nunure ra ningo.

18 A dekdek i kaugu minait i vadur kaugu mal;

Ma i dadat tagu da ra tabara.

19 God i vue tar iau ta ra pikai

Ma iau da ka ra tobon ma ra kabu na iap.

20 Iau kail tadav u, ma pa u bali iau;

Ma ba iau tur, u tia gigira tamtavun uka tagu.

21 U tar pukue kaum mangamangana, ma pa u mari mule iau;

U vakaina iau ma ra dekdek i ra limam.

22 U puak tar iau urama ta ra ul a vuvu, ma u vaki iau tana;

Ma u vakaina iau ta ra karangap i ra vuvu.

23 Iau nunure ba una ben pa iau tar ta ra minat,

Tadav ra pal di ga tibe pi kai ra umana launa par.

24 Dave, nina i to na virua pa na tulue laka ra limana,

Ma pa na kail laka upi ta maramaravut ta ra ana varmonong?

25 Dave, pa iau ga tangi ure nina i ga ki kaina,

Ma ra balagu pa i ga tabun ure diat dia ga ki na niiba?

26 Ma ba iau ga ungung pa ra boina, a kaina ka i ga arikai;

Ma ba iau ga ungung pa ra kapa, a bobotoi ka i ga arikai.

27 A balagu i malamalapang, ma i purpuruan;

A umana bung na varmonong dia ga tadav iau.

28 I korong ra pakagu, ma pa i vuna ta ra keake;

Iau tur rikai ta ra kivung, ma iau kail upi ra maramaravut.

29 Iau a tura i ra umana kuabar na pap,

Ma ra talai ra umana murup.

30 A pal a pakagu i korong ma i tapapak kan iau,

Ma ra urugu i avavian ta ra malamalapang.

31 Di pukue kaugu pagol upi ra tinabun,

Ma kaugu vuvu upi ra nilai diat dia tangtangi.