1 Ea, Iob, una valongore kaugu pirpir,

Ma una nuk pa kaugu lavur tinata.

2 Gire, iau papa ra ngiegu,

Ma ra karameagu i tata.

3 Kaugu tinata i vaarike ke nam i takodo ta ra balagu,

Ma ra ura bul na ngiegu dir tatike ra dovotina.

4 Ra Tulungea i God i ga vaki iau,

Ma ra ubar i ra Dekdek Muka i ga tul tar ra nilaun tagu.

5 Ona una pait valar pa ia, una bali kaugu tinata;

Una tut, ma dor.a vartoto.

6 Ta ra luaina mata i God dor varogop uka;

Di ga pait bula iau ma ra pia petpetep.

7 Koko una burut ure ta magit tagu,

A limagu pa na ki dekdek taun u.

8 A dovotina, iau ga valongore u ba u ga tata,

Ma iau ga valongore bula ra nilaim, ba u ga biti:

9 I gomgom ra balagu, ma pa ta varpiam tagu;

Iau langalanga ka, ma pa ta kaina mangamangana piragu.

10 Ea, i takun iau,

I nuk tar iau ba kana ebar;

11 I vung ra ura kaugu ta ra babat keke,

Ma i makmakile kaugu lavur nga.

12 Ea, go kaum mangamangana pa takodo, damana ina bali u,

Tago God i manga ngala kakit ta dir ma ra tutana.

13 Ta ra ava u vartoto me,

Ba pa i valongore kaum kinail?

14 Tago God i tata tika na pakana,

Maia, a ura pakana, ia kaka ra ta.rai pa dia nuk pa ia.

15 Ta ra ririvon, ma ra ninana na marum,

Ba ra tarai dia tarurungai,

Ba dia va mat ta kadia umana vava,

16 I vaarike ra umana magit pire diat,

I vaburut diat ma ra umana varvalai,

17 Upi na ben valilikun diat kan kadia kaina mangamangana,

Ma na vung vue ra mangamangana kolakolo kai ra tarai;

18 Upi na balaure bat ra tulungea i diat kan ra tung,

Ma kadia nilaun kan ra vinirua.

19 I vapagumanene ra tutana ma ra kinadik ta kana vava,

Ma i kankadik ra umana uruna;

20 Tuk tar ra balana i ole ra nian,

Ma pa i mainge mule ra kirip.

21 I maroro ra pakana;

Ma i palaur kakit.

22 A tulungeana i marave ra tung,

Ma ra angelo na minat i maravai ka.

23 Gala kana angelo i ki,

A tena maramaravut, tikai ta diat ra arip na marmar,

Upi na ve ra tutana ure ra magit i takodo;

24 Ma i mari ia ma i biti:

Da valaun ia kan ra tung,

Tago iau tar tadav ra varkul ure.

25 I tubu mulai; ra pal a pakana i boina ta dir ma ra pal a paka i ra bul,

Ma i kap mule ra dekdek i ra barmana;

26 I araring tadav God, ma God i mari ia;

I lotu tadav ia ma ra gina;

Ma i ve ra tarai ure kana varvalaun,

27 I kakailai tadav diat dari:

Iau ga varpiam uka, iau ga vanavana irai,

Ma pa i ga kure bali iau;

28 I ga valaun iau kan ra tung,

Upi kaugu nilaun na gire mule ke ra kapa.

29 Ma God i pait vartataurane go,

A ura pakana, maia, a utul a pakana ure ra tarai,

30 Upi na ben valilikun diat kan ra tung,

Upi diat a gire mule ra kapa na nilaun.

31 Ea, Iob, una ki na valavalongor tagu,,

Ma una ki mut, ma ina tata.

32 Gala kaum ta tinata, una bali iau;

Una tata, tago iau mainge ba ina valangalanga u.

33 Gala pata, una valongore iau;

Una ki mut, ma ina vateten u ta ra kabinana.