1 Ta go bula ra balagu i dadadar,

Ma i pipipidil ta kana pakana.

2 Avat a valongore ra nilaina, i ti ngala mat,

Ma ra kurkurung i arikai ta ra ngiene.

3 I tulue ra rurungana vurvurbit ta ra vavai na bakut,

Ma kana meme ta ra lavur ngu na rakarakan a gunagunan.

4 A rurunga i mur ra meme;

God i tata ma ra ngala na nilai kana minamar,

Ma pa i tur bat ra meme ba di valongore ra nilaina.

5 A dekdek na nilai God i vaarike kana lavur enana papalum;

I pait ra umana ngala na magit, nina pa da nuk valar pa diat.

6 Tago i biti ta ra madoldol na mavoko: Una bura ta ra gunagunan;

Ma damana ta ra bata ma ta ra dekdek na bata: Una ongor.

7 I tur bat ra papalum kai ra tarai,

Upi ra tarai par diat a kapa tana.

8 A umana leing dia ruk ta kadia umana bakbakit,

Ma dia kiki ta kadia umana babang.

9 A karangap na vuvu i tut rikai maro ra matana taubar,

Ma ra madoldol i vut maro ra matana labur.

10 A ais i arikai ta ra ubar kai God,

Ma ra umana polakikil dia dekdek ta ra madoldol.

11 A bakut i mamat ma ra bata;

Ma i palapala ia ta ra umana bakut.

12 Ta kana varkurai i vana vurvurbit,

Upi na pait ot pa kana vartuluai ta ra mata i ra rakarakan a gunagunan.

13 Ba ure ra varpit, ba ure kana pia,

Ba ure ra varmari, ia iat i tulue.

14 Ea, Iob, una ki na valavalongor;

Una tur vovovon, ma una nukure ra lavur enana papalum kai God.

15 Dave, u nunure ba God i kure davatane diat,

Ba ra meme i arikai dave kan kana bakut?

16 U nunure laka ba ra lavur gobol a bakut dia tabataba dave,

A papalum kai nina kana minatoto i ko kakit?

17 U nunure ra vuna ba kaum umana mal dia malamalapang,

Ba ra rakarakan a gunagunan i mutmut ure ra taubar?

18 I tale u laka pi una pala are ra pal a bakut,

Nina i dekdek da ra tiroa na palariam gobol,

Da ia iat i pait ia?

19 Una tovo avet ta ra magit ba avet a tatike pirana;

Ave ma nuknuk upi ta tinata tago pa i kapa.

20 Da ve laka ba amir a tata me?

Gala ta tutana na tata, gala na papaniai.

21 Ma go pa i tale ra tarai ba diat a bobe ra matana keake,

Nina i rarao mat ta ra bakut,

Ba ra vuvu i tar vut ma i tar kap vue ra umana bakut.

22 Ma ra kapa i rarao mat i arikai maro ta ra matana labur;

God i mong ma kana ngala na minamar.

23 Pa i tale dat pi dat a nunure ot pa ra

Dekdek Muka; a dekdekina i manga lia kakit;

Kana varkurai i takodo vurakit, ma pa na kure varara ta tikai.

24 Damana ra tarai dia ru ia; la iat pa i kap nuk upi diat dia malamala tena kabinana tana.