1 Natugu, ba u vatur vake kaugu tinata,

Ma ba u vung vake kaugu umana vartuluai piram,

2 Upi ra talingam na valongore ra kabinana,

Ma ra nuknukim na ongor upi ra minatoto;

3 Maia, ba u kakail upi ra nana ilam,

Ma ba u vatang upi na kapa ra nuknukim,

4 Ba u tikatikan upi ia da upi ra mani,

Ma ba u peng pa ia da ra ngatngat na tabarikik di ga ive;

5 Io, na kapa piram ra variru tadav ra Luluai,

Ma una nunure God tana.

6 Tago ra Luluai i tul tar ra kabinana;

A kabatau ma ra minatoto dir arikai ta ra ngiene;

7 I vung vake ra dovot na kabinana upi kadiat i dovot ra bala i diat,

Ma ia ra ramravit kadiat i takodo kadia mangamangana;

8 Upi na balaure ra nga ure ra takodo na varkurai,

Ma na mono bat ra nga kai kana lavur dovot na tena lotu.

9 Damana una matoto ta ra mangamangana takodo, ta ra takodo na varkurai,

Ma ta ra dovot na mangamangana, maia, ma ta ra lavur bo na nga.

10 Tago ra kabinana na ruk ta ra nuknukim,

Ma ra balam na gugu ta ra minatoto;

11 A ninunuk lua na mono bat u,

Ma ra kapa na ninunuk na mataure u;

12 Upi na valaun u kan ra kaina nga,

Kan ra tarai dia tatike ra magit i gegagege,

13 Nina dia vana kan ra lavur takodo na nga,

Upi diat a vanavana ta ra lavur nga na bobotoi,

14 Nina dia ga upi diat a pait ra varpiam,

Ma dia manga gugu ta ra kaina tavir,

15 Diat ba i gegagege kadia lavur nga,

Ma dia rara ta kadia vinavana;

16 Upi na langalanga kan ra enana vavina,

Kan ra vaira iat nina i varmananai vavaongo ma kana tinata,

17 Nina i leingane talaina i ga manane ba i ga inip boko,

Ma i valubane ra kunubu kai kana God;

18 Tago ra kubana i kokopo upi ra minat,

Ma kana lavur nga dia vana rikai pire diat dia tar mat;

19 Diat par dia ruk pirana pa diat a lilikun mulai,

Ma pa diat a tadav mule ra nga na nilaun.

20 Damana una murmur ra bo na tarai,

Ma una vanavana ta ra nga kai ra umana tena takodo.

21 Tago ra dovot na tarai diat a kiki ta ra gunan,

Ma diat dia ko kakit diat a ki vatikai tana.

22 Ma ga ra umana tena varpiam da mut vue diat kan ra gunan,

Ma diat dia vavagu da rubat vue diat kan ia.