27
1 Koko una langlang ure karagam,
Tago pa u nunure ra magit ba na vana rikai tai tika na bung.
2 Ra enana tutana na pite pa u, ma koko ra ngiem iat;
A vaira, ma koko ra bul na ngiem iat.
3 A vat i mamat, ma ra veo bula;
Ma ra kankan i vuna ta ra lunga i mamat ta dir.
4 A kulot i varvakadik, ma ra kankan i kaina tuna;
Ma na tale to ia ba na tur ta ra luaina mata i ra varkukur?
5 A varpit di pait ia ta ra kapa
I boina ta dir ma ra varmari ba i tur ivai.
6 Ba talai dat i kita dat i vuna ta ra varmari;
Ma ga ra ebar i peal kana vargalum.
7 Nina ba i tup ia ra minaur i vue ra bulit na livur,
Ma pire nina i mulmulum a lavur mapak na magit par dia kalakalami.
8 Da ra beo i vana irai kan kana po,
Damana ra tutana ba i vana irai kan ra kubana.
9 A dangi na vartap ma ra polo i ang na katkat dir vagugu ra bala i ra tarai,
Damana ra varmari kai talai tikai ba i arikai ta ra dovot na nuknukina.
10 Koko una nur vue talaim iat ma talai tamam;
Ma koko una ruk ra kuba i turam ta ra bung ba u malari tana.
Talaim i ki maravai i boina ta dir ma turam i ki vailik.
11 Natugu, una vagagane ra balagu ma una kabinana,
Upi ina bali valar pa nina i vul iau.
12 A tena kabinana i gire ra kaina ma i parau,
Ma ra umana papaua dia bolabolo vanavana ka, ma i tup diat.
13 Una tak pa ra mal kai nina i tar vavalima ure ra vaira,
Una kure pi na pait ot pa kana vavalima pire ra enana vavina.
14 Nina ba i tata vadoane talaina ma ra ngala na nilaina ta ra malana ikilik,
Da biti ba i varogop ma ra varboar.
15 A tuatua ba pa i ngo ta ra bung na bata tuna
Dir vardada ma ra vavina, a tena varngangar;
16 Nina i mainge ba na tur bat ia, i tur bat ra vuvu,
Ma i da ra limana tuna i vatur ra dangi.
17 A palariam i vamangi ra palariam,
Damana ra tarai dia vargat vargiliane diat.
18 Nina i balaure ra lovo na en ra vuaina,
Ma nina i kudakudar pire kana luluai na vatur vake ra variru.
19 Da ra malalar i ra tutana ta ra tava dir varogop ma ra matana tuna,
Damana ra nuknuk i ra tutana i vaarike ra tutana iat.
20 A ruarua na tulungen ma ra tavul a vinirua pa dir maur ta tika na bung,
Ma ra mamainga kai ra tarai pa i ngo ta tika na bung.
21 Di tun vagomgom ra silva ta ra kabala, ma ra goled ta ra ubu,
Ma di valar ra tutana ma ra pite varpa pirana.
22 Ma ona u akak gigi ra lunga ma ra tututuk ta ra la na vat livuan ta ra kon di gigi ia,
A dovotina kana mangamangana papaua pa na vana kan ia.
23 Una ongor upi una nunure bai dave kaum kikil na sip,
Ma una balaure bulu kaum lavur vavaguai;
24 Tago ra ngala na tabarikik pa i tur vatikai;
Ma dave, da vatur vake ra kere na king pa na mutu vang?
25 Ba di varurue ra vura i makuk, ra kalamana i gol rikai mulai,
Ma di ilibe ra vurigir ta ra lualuana.
26 A umana nat na sip ure kaum mal,
Ma ra umana me ure ra matai ra pia;
27 A polo na u i ra me na topa ra am magit, ma ra adiat ta ra kubam,
Ma kaum lavur tultul na vavina diat a maur tana.