1 Luluai kaugu God, iau nurnur piram;

Una valaun iau kan diat par dia korot mur iau, ma una valangalanga iau;

2 Kan na karat kadakadal kaugu nilaun da ra leon,

Na kadal ia, ma pa ta na ati ba na valaun ia.

3 Luluai kaugu God, ona iau tar pait go;

Ona i kaina ra limagu;

4 Ona iau tar bali nina amir ga ki na malmal me ma ra kaina;

(Maia, ma iau ga valangalanga kaugu ebar vakuku;)

5 Boina ba ra ebar na vakaina kaugu nilaun, ma na kinim vake;

Maia, na ruarua taun iau ura ra pia,

Ma na vaki kaugu minamar ta ra tobon. Sela.

6 Una tut, Luluai, ta kaum kankan,

Una vadadake u ma una tur bat ra nginangal na kulot kai kaugu umana ebar;

Ma una tavangun maravut iau; u tar vartuluai upi ra varkurai.

7 Ma boina ba ra kor na tarai na tur kikilane u;

Ma una vana urama liu ta diat.

8 Ra Luluai i pait ra varkurai pire ra tarai;

Una kure iau, Luluai, vardada ma ra takodo na maukuagu,

Ma vardada ma ra dovotina i ki tagu.

9 Boina ba ra varpiam kai ra lavur tena varpiam na par, ma una vatur vapadikat ra umana tena takodo;

Tago God, a tena takodo, i valar ra nuknuk i ra tarai ma ra bala i diat bula.

10 God kaugu ramravit,

Nina i valaun diat i dovot ra bala i diat.

11 God a takodo na tena varkurai,

Maia pa, ia ra God ba na kankan ure ra kaina a bungbung par.

12 Ona ta tikai pa i nukpuku, na al vamangi kana pakat na vinarubu;

I tar lele kana panak, ma i tar vaninare.

13 I tar mal bula. ra ana rumu na minat;

Ma kana umana pu i vabirao diat.

14 Ea, i mamat ra nuknukina ma ra kaina;

Maia pa, i tar lalau pa ra magit i bilak, ma i kava vue ra vavaongo.

15 I tar kal ra tung, ma i kal valulur pa ia,

Ma ia iat i tar bura ta ra tung i pait ia.

16 Kana bilak na mangamangana na pipit likun ta ra uluna iat,

Ma kana mangamangana karangap na ki taun ra tunurot na uluna.

17 Ina pite pa God da i topa ia ure kana mangamangana takodo;

Ma ina kakailai na pite varpa tadav ra iang i ra Luluai ra Ngala Kakit.