1 A lavur bakut i varvai ure ra minamar i God,

Ma ra maup i vaarike ra papalum na limana.

2 Tikatika na bung na keake i ve tar ia ta ra bung na keake mulai,

Ma tikatika na marum i vamatotone pa ta ra marum mulai.

3 A dovotina pa ta tinata ma pa ta vatavatang;

Pa di valongore ra nilai dir.

4 Kadir langun i tuk tar ta ra rakarakan a gunagunan par,

Ma kadir tinata ta ra lavur ngungu na gunagunan mutu.

God i tar pait ra kuba i ra keake tana,

5 Nina ba i varogop ma ra taulai kalama i irop ta ra kubana,

Ma i gugu da ra tena ongor i vutvut ta kana vinavana.

6 Kana vinavana i tur pa ia ta ra ngu na lao,

Ma i tuk tar mulai ta ra lavur ngunguna;

Ma pa ta magit ba pa i kairane ra lapapuna.

7 A vartovo kai ra Luluai i ko vurakit ma i valar ra tulungea i ra tarai;

A varvai kai ra Luluai i dovot, ma i vakabinana diat dia tuptup.

8 A umana togotogo kai ra Luluai dia takodo, ma dia vagagane ra bala i ra tarai.

A vartuluai kai ra Luluai i gomgom, ma i vanana pa ra kiau na mata i ra tarai.

9 A variru tadav ra Luluai i gomgom, ma i tur pa na mutu;

A umana varkurai kai ra Luluai dia dovot ma dia takodo par.

10 I topa ia ba da manga anan upi diat, ma koko da manga anan upi ra goled;

Maia pa, ma upi ra ngala na goled ba i ngatngat bula, pata.

Dia manga kalami ta dir ma ra bulit na livur

Ma ra polo ta ra bulit na livur.

11 Dia vaale kaum tultul;

Ma nina i toratorom ta diat na kale pa ra ngala na vapuak.

12 Ia na nunure ilam kana lavur nirara?

Una pun vue kaugu lavur nirara dia tur ivai.

13 Una tur bat kaum tultul ta ra umana varpiam tuna,

Koko diat a kure iau; damana ina ko vurakit,

Ma ina langalanga kan ra ngala na mangamangana varpiam.

14 Boina ba ra tinata na ngiegu ma ra ninunuk ta ra balagu na takodo ta ra luaina matam,

U Luluai, kaugu rivarivan ma kaugu tena valaun.