1 Luluai, a king na gugu ta ra dekdekim;

Ma na manga gugu ta kaum valavalaun!

2 U ga tabar ia ma ra magit a balana i ga mainge,

Ma pa u ga muie nam i ga lul upi ia ma ra ngiene. Sela.

3 Tago u totongo upi ia ma u vadoane ma ra umana bo na magit;

U vatoke tar ra vipuar na goled i ngatngat.

4 I ga lul ra nilaun tam, ma u tul tar ia tana;

Ba na lolokon kana nilaun ma pa na mutu.

5 I ngala kana minamar ure kaum valavalaun;

U vauluve ma ra variru ma ra minong.

6 Tago u vadoane pa na mutu,

U vagugu pa ia ma ra gugu ta ra luaina matam.

7 Tago ra king i nurnur tai ra Luluai,

Ma ta ra varmari kai ra Ngala Kakit pa na takari.

8 A limam na tikan tadav diat par kaum umana ebar;

A limam tuna na tikan tadav diat dia milikuane u.

9 Una kure diat upi diat a varogop ma ra ubu na iap ta ra luaina matam.

Ra Luluai na konome diat ta kana kankan,

Ma ra iap na en vue diat.

10 Una li vue ra umana natu i diat kan ra rakarakan a gunagunan,

Ma ra umana bul mur ta diat kan ra tarai.

11 Ba dia vaninare value ta kaina magit ure u,

Ba dia abe pa ta kaina mangana, pa dia pait valar pa ia;

12 Tago u pukue vatalil diat,

Ma una al vaninare kaum vinau na panak upi ra mata i diat.

13 Luluai, una ngalangala ta ra dekdekim iat;

Damana avet a kakailai, ma avet a pite pa kaum niongor.