1 Iau ga kiki vovovon upi ra Luluai,

Ma i ga lingan upi iau, ma i ga torom ta kaugu kinail.

2 Ma i ga al vairop iau kan ra tung na vinirua, ma kan ra kaina pikai;

Ma i ga vatur ra kaugu ta ra ul a vat i ta, ma i ga vapadikat kaugu vinavana.

3 Ma i tar vaki ra kalamana kakailai ta ra ngiegu,

Maia pa, a pite varpa tadav kada God;

Mangoro diat a gire, ma diat a burut,

Ma diat a nurnur tai ra Luluai.

4 I ti doan nam ra tutana ba i nurnur tai ra Luluai,

Ma pa i nuk pa diat i kolakolo ra nuknuk i diat, ma diat bula dia papait ra vartuam, pata.

5 Luluai, kaugu God, i ti peal kaum lavur enana papalum,

Ma kaum lavur nuknuk, nina ba u tar pait ot pa diat ure avet;

Pa ta na mulai ba amur a varogop me;

Gala ina varvai ma ina tatata ure diat,

Gala i dekdek upi ina luk puput pa diat.

6 Vakir u gugu ta ra vartabar, ma ra tinabar bula pa u gugu tana;

U tar papa are ra talingagu;

Vakir u mainge ra tinabar di tun tar ia, ma ra varporong bula pata.

7 Io, iau ga biti: Ea, iau tar pot;

Di tar tutumu ure iau ta ra pinpin na buk;

8 Kaugu God, iau ga upi ina pait ra nuknukim;

Maia, kaum vartovo i ki ta ra balagu.

9 Iau tar varvai ure ra mangamangana takodo ta ra ngala na kor,

Ea, pa ina tigal bat ra bul na ngiegu,

U tar nunure, Luluai.

10 Pa iau ga ive kaum mangamangana takodo ta ra balagu,

Iau tar vaarike ra dovot na maukuam ma kaum valavalaun;

Pa iau ga vapidik kaum varmari ma kaum dovot na mangamangana kan ra ngala na kor.

11 Luluai, koko una kamale kaum bala na varmari tagu;

Boina ba kaum varmari ma kaum dovot na mangamangana dir a vaale bat vatikene iau.

12 Tago ra umana kaina magit dia tur kikilane iau, dia vurot tuna.

Kaugu varpiam i vila mur tadav iau, ma i dekdek upi ina tadaraka;

I peal tuna, ma ra lavur pepe na ulugu pata, ma ra balagu i tar bilua.

13 Boina, Luluai, una valangalanga iau,

Luluai, una rurut ma una maravut iau.

14 Boina ba diat par dia mainge ba diat a vamutue iau,

Diat a vavirvir ma diat a purpuruan;

Boina ba da pukue vatalil diat dia gugu ta kaugu kinadik, ma diat a ruva bula.

15 Diat dia biti tagu: Ioi! Ioi!

Diat a ki na uliran ika ure kadia vavirvir.

16 Boina ba diat par dia nuk up u diat a manga gugu ma diat a ga tam;

Ma diat dia mainge kaum valavalaun, diat a biti vatikai dari:

Da pite vangala pa ra iang i ra Luluai.

17 Ma iau a malari na tutana ma iau a luveana;

Ma ra Luluai i nuk pa ka iau.

U kaugu maramaravut ma kaugu tena valaun;

Koko una vavuan, u kaugu God.