1 Ave tar valongore ma ra talinga i vevet iat, God, a umana tama i vevet dia tar ve avet ure

Ra lavur magit u ga pait ia amana ba dia ga laun.

2 U ga rubat vue ra umana Tematana ma ra limam iat, ma u ga kalie diat;

U ga vakadik ra tarai vakuku, ma u tul vue diat upi diat a ingaingarina varbabaiai.

3 Tago vakir dia ga vatur vake ra gunan ure kadia pakat na vinarubu,

Ma pa dia ga ongor pa ia ma ra lima i diat iat,

Dia ga ongor pa ia ka ure ra limam, a limam tuna iat, ma ure ra kapa na matam,

Tago u ga gugu ta diat.

4 U kaugu king, kaugu God,

Una kure tar ra valavalaun upi kai Iakob.

5 Avet a taun bat kaveve lavur ebar ure u kaka,

Ta ra iangim ave rua bereng diat dia tut na vinarubu ure avet.

6 Tago pa ina nurnur ta kaugu panak,

Ma kaugu pakat na vinarubu pa na valaun iau.

7 U kaka u ga valaun avet kan kaveve lavur ebar,

Ma u varuva diat dia milmilikuane avet.

8 Ta ra bungbung parika ave langlang tai God,

Ma avet a pite vatikene pa ra iangim. Sela.

9 Ma go u tar vung vue avet, ma u tar varuva avet;

Ma pa da varagur ma kaveve loko na tarai na vinarubu.

10 Ave vilau ka kan kaveve umana ebar;

Ma diat dia milikuane avet, dia ra varpa vardada ma kadia mamainga.

11 U tar tul tar avet, ma ave varogop ma ra umana sip di poko diat

Ma u tar vaki varbabaiane avet livuan ta ra umana Tematana.

12 U ivivure kaum tarai ure ta paupau magit ika,

Ma pa u pie pa ta tabarikik ma ra mataina.

13 U vaki avet da ra magit na milmilikuan pire ra umana talai vevet,

Ave da ra magit na vavirvir ma ra magit na varkulumai pire diat dia ki kikilane avet.

14 Ave da ra tinata na varvakok livuan ta ra lavur Tematana,

Ma dia loloe ra ulu i diat ta vevet.

15 A bungbung par i tup iau ra niruva,

Ma ra vavirvir i turup ra matagu.

16 Ure ra tinata kai ra tena varkulumai ma ra tena varvul,

Ma ure ra ebar ma ra tena varobo.

17 Go ra lavur magit i tadav avet;

Ma pa ave valubane u,

Ma pa ave rara kan kaum kunubu.

18 A bala i vevet pa i vana tapuku,

Ma pa ave vana kan kaum nga,

19 Upi una kita ngidangide avet ma avet a da ra uliran na gunan,

Ma upi una vamalur avet ma ra malur na minat.

20 Ari da ga valubane ra iang i kada God,

Ba ona da ga tulue vaarike ra lima i dat upi ta enana god,

21 God pa na tikan tadav ia bar?

Tago i nunure ra lavur magit i pidik ta ra nuknuk i dat.

22 Maia, di ubu doko avet a bungbung par ure u,

Di nuk varogopane avet ma ra umana sip da ure ra vardodoko.

23 Luluai, una tut, ta ra ava u va mat ika?

Una tut, koko una vung vue vatikene avet.

24 Ta ra ava u ive ra matam,

Ma u nuk vue kaveve kinadik ma kaveve kaina kini?

25 Tago ave va palar ta ra tobon,

A bala i vevet i ki petep ta ra pia.

26 Una tut upi una maravut avet,

Ma una valaun avet ure kaum varmari.