1 A rakarakan a gunagunan par, una kukula na gugu tadav God;

2 Avat a vaarike ra minamar i ra iangina ma ra kakailai;

Avat a mal tuna kana pite varpa.

3 Avat a biti tai God: Kaum lavur papalum dia enana tuna!

Tago a dekdekim i ngala na kaia, kaum lavur ebar diat a ongo tam.

4 A rakarakan a gunagunan na lotu piram,

Ma na kakailai piram;

Maia, na kakailai tadav ra iangim. Sela.

5 Avat a mai, avat a gire ra lavur papalum kai God;

I ti enana tuna kana mangamangana tadav ra umana natu i ra tarai.

6 I vaenana pa ra ta, ma i da ra pia mage;

Dia tinur bolo ko ta ra lubu;

Abara ave. ga gugu tana.

7 I varkurai vatikai ma ra dekdekina,

A matana i makmakile ra lavur Tematana;

Koko ra tarai na varpiam diat a vangala pa diat mulai. Sela.

8 Avat a lavur vuna tarai avat a pite pa kaveve God,

Ma avat a taorong ma ra tinata na pite varpa pirana;

9 Nina i tar valaun avet,

Ma pa i nur tar ia ba ra kau i vevet na tagalir.

10 Tago u, God, u tar valar avet,

U tar tun vagomgom avet, da di tun vagomgom ra silva.

11 U tar akir avet;

U tar vako tar ra mamat na kinakap ta ra tamuru i vevet,

12 U ga tul tar ra tarai upi diat a vutvut rua taun ra ulu i vevet;

Ave tinur bolo ta ra iap ma ta ra tava;

Ma u ga ben vairop avet, ma u vaki avet ta ra gunan na gugu.

13 Ina ruk ta ra kubam ma ra tinabar di tun tar ia,

Ina pait ot pa kaugu umana vavalima piram,

14 Nina i ga arikai ta ra bul na ngiegu,

Ma ra ngiegu i ga vatang diat ba iau ga ki na malari.

15 Ina tul tar ra tinabar tam, nina di tun tar ia, a monoina,

Varurung ma ra ang na sip, a tomotoina.

Ina tul tar ra umana bulumakau ma ra me. Sela.

16 Avat par ava ru God, avat a mai ma avat a valongore,

Ina vaarike ra magit i ga pait ia ure iau.

17 Iau ga kail ia ma ra ngiegu,

Ma iau ga pite vangala pa ia ma ra karameagu.

18 Tumu iau nuk pa ra varpiam ta ra balagu,

Ra Luluai pa na valavalongor;

19 Ma a dovot God i tar valongor,

I tar torom ta kaugu tinata na niaring.

20 Da pite pa God,

Nina ba pa i pidimuane kaugu niaring,

Ma pa i tak vue kana bala na varmari kan iau.