1 Luluai, iau tar rivarivan piram;

Koko ina vavirvir ta tika na bung.

2 Una ga valangalanga iau, ma una ga valaun iau ta kaum takodo na mangamangana;

Una valongore iau, ma una valaun iau.

3 Una da ra dekdek na bakbakit piragu upi ina vala vilau ruk tana;

U tar varkurai ba da valaun iau,

Tago u kaugu vat ki ma kaugu dekdek na pal na bakbakit.

4 Kaugu God, una valaun iau kan ra lima i ra tena varpiam,

Kan ra lima i ra tutana i gegagege ra nuknukina, ma pa ta varmari i ki ta ra balana.

5 Tago iau nurnur tam, Luluai God,

Papa ra kilala iau ga bul tana, iau nurnur tam.

6 Papa ra bung di ga kava iau tana, iau tur bokon tam;

U kaugu tena minamal papa ra e iau ga ki boko ra bala i nagu tana;

Ina pite vatikene pa u.

7 Mangoro dia kakaian tagu;

Ma u kaugu dekdek na bakbakit.

8 A ngiegu na buka ma ra pite varpa,

Ma ra tinata na variru piram a bungbung parika.

9 Koko una vung vue iau ba iau kua;

Koko una vana. balakane iau ba ra dekdekigu i papait na panie.

10 Tago kaugu lavur ebar dia pirpir ure iau,

Ma diat dia kiki uai upi iau dia tata varurung,

11 Dia biti: God i tar vana balakane;

Avat a korot mur ia, ma avat a kinim pa ia;

Tago pa ta na akari ba na valaun ia.

12 God, koko u ki vailik kan iau;

Kaugu God, una rurut upi una maramaravut iau.

13 Boina ba ra umana ebar ure kaugu nilaun diat a vavirvir ma diat a panie,

Ma diat dia ling na vakaina iau, boina ba na tup diat ra vavirvir ma, ra niruva.

14 Ma iau, ina ki nunur vatikai,

Ma ina vangala pa mule ra pite varpa piram.

15 A ngiegu na varvai ure kaum mangamangana takodo,

Ma ure kaum valavalaun a bungbung parika,

Tago i dekdek upi ina vatang ot pa ia.

16 Ina tur pa ia ma ra umana dekdek na papalum kai ra Luluai God,

Ina vatang kaum mangamangana takodo, maia, kaum kakika.

17 God, u tar vateten iau papa ra e iau ga bul tana;

Ma tuk tar gori iau tar vaarike kaum lavur enana papalum.

18 Maia, ma ba iau patuan boko, ma ba ina kua, koko una vana kan iau;

Tuk tar ta ra bung ba iau ga vaarike tar ra ongorim ta ra taun tarai namur,

Ma ra dekdekim ta diat tikatikai ba diat a laun namur.

19 God, kaum mangamangana takodo i ngala kakit,

U, u tar pait ra umana ngala na magit,

God, to ia mulai ba amur a vardada me?

20 U, ba u ga tulue mangoro na magit na varmonong tadav iau,

Una ga valagar mule iau,

Ma una vairop mule iau kan ra bala na pia.

21 Una vatavua kaugu ngala na kini,

Ma una lingan mulai, ma una vamaram iau.

22 Ina pite pa u ma ra dedede,

Maia, ina pite pa kaum dovotina, kaugu God,

Ina kakailai na pite varpa tadav u, ma ra pagol na maravut ia,

U ra Lia Kakit kai Israel.

23 A bul na ngiegu na gugu ba iau kakailai na pite varpa piram;

Damana kabila ra tulungeagu, nina u ga valaun ia,

24 A karameagu bula na tata ure kaum mangamangana takodo a bungbung par;

Tago diat dia mainge ba diat a vakaina iau, dia tar vavirvir ma dia tar purpuruan.