1 God, koko una ki mut uka,

Koko una paum bat ra ngiem, ma koko una ngo, God.

2 Tago kaum umana ebar dia urung,

Ma diat dia milikuane u dia tar vatur ra ulu i diat urama.

3 Dia varpit ure kaum tarai,

Ma dia tata guvai ure kaum tarai nina u mataure diat.

4 Dia tar biti: Uti, dat a vakaina vue diat, upi koko diat a vuna tarai mulai;

Upi koko da nuk uraure mule ra iang i Israel.

5 Tago dia tar tata rangup, ma i kopono ko ra nuknuk i diat;

Dia pait ra kunubu upi diat a tur bat u;

6 Diat dia ki ra umana pal na mal, a tarai Edom ma ra tarai Ismael;

Moab, ma ra tarai Agar;

7 Gebal, ma Amon ma Amalek;

Pilistia diat ma ra tarai Tiro;

8 Asiria bula diat;

Dia tar maravut ra tarai Lot. Sela.

9 Boina ba una pait nam ra magit ta diat ba u ga pait ia tai Midian;

Ma tai Sisera, ma tai Iabin, ta ra tava alir Kison;

10 Nina dia ga virua aro En-Dor,

Ma dia ga varogop ma ra puta i va ra pia ka.

11 Una kure vakaina kadia umana tadar na tutana da Oreb ma Seb,

Maia, kadia umana rangrang par da Seba ma Salmuna;

12 Diat dia tar biti dari: Boina dat a taun ra gunagunan kai God.

13 Kaugu God, una kure diat upi diat a vardada ma ra tobon ika nina i pulung tavurvuru;

Ma diat a da ra mapmapina ba ra vuvu i kapkap ia.

14 Da ra iap i vaimur ra pupui,

Ma da ra biro na iap di vautunge ra lualuana me,

15 Damana una korot mur diat ma kaum kalivuvur,

Ma una manga vaburut diat ma kaum ngala na vuvu.

16 A mata i diat na malari tuna;

Upi diat a tikatikan upi ra iangim, Luluai.

17 Boina ba diat a vavirvir, ma diat a burut vatikai;

Maia pa, diat a ruva ka, ma diat a virua;

18 Upi diat a nunure ba u kaka, u ba ra iangim, a Luluai,

U ra Ngala Kakit ta ra rakarakan a gunagunan.