88
A kinail upi ra maramaravut
A kakailai kai ra tarai Kora; kai nina i lue ra kakailai; a tiun Makalat-Leanot; a mari na kakailai kai Eman ra te Esra.
1 Luluai God, kaugu tena valaun,
Iau tar tangi ta ra luaina matam ra keake ma ra marum.
2 Boina ba kaugu niaring na vana rikai piram,
Una torom ta kaugu kinail;
3 Tago ra balagu i purpuruan na kaia,
Ma ra tulungeagu i marave ra ruarua na tulungen.
4 Di luk varurungane avet ma diat dia kuba ta ra tung;
Iau varogop ma ra tutana. ba pa ta dekdekina;
5 Iau va livuan ta diat dia mat,
Iau da diat dia tar virua ma dia va ta ra tung na minat,
Nina ba pa u nuk pa mule diat,
Ma pa u vatur vake mule diat.
6 U tar vadiop iau ta ra tung ara iat,
Ta ra gunan i bobotoi ma ta ra marmarumian.
7 Kaum kulot i monong iau,
Ma u tar vakaina iau ma kaum lavur bobol. Sela.
8 U tar vaki ra umana talaigu vavailik kan iau,
Iau da ra magit na milmilikuan tuna pire diat;
U tar liplip bat iau, ma i dekdek upi ina irop.
9 A varmonong i vuna tago ra matagu i gamgavul;
Luluai, iau tar kail tadav u a bungbung par,
Iau tar tulue vaarike ra limagu piram.
10 Dave, una ga pait ra umana magit na kinaian ure ra lavur minat bar?
Ma ra umana minat diat a tut rikai bar upi diat a pite pa u? Sela.
11 Dave, da varvai vang ure kaum varmari ta ra tung na minat,
Ba ure ra dovot na maukuam ta ra tavul a vinirua?
12 Dave, da nunure kaum lavur papalum na kinaian ta ra bobotoi,
Ma kaum mangamangana takodo ta ra gunan di valubane ra lavur magit i tana?
13 Ma Luluai, iau tar tangi tadav u,
Ma ta ra malamalana kaugu niaring na vana rikai piram.
14 Luluai, ta ra ava u vung vue iau?
Ta ra ava u ive ra matam kan iau?
15 Iau ki na malari, ma iau to na mat papa ra bung iau ga bul tana;
Kaum varvaburut i monong iau, ma iau ngarangarao tuna.
16 U ti ngangal na kulot ure iau,
Kaum lavur varvaburut dia tar vamutue iau.
17 Dia vana kikilane iau da ra lovon ta ra bungbung par,
Dia vila bat iau, diat parika.
18 U tar varbaiane avet ma ra umana talaigu ma ra umana turagu, dia ki vailik kan iau,
Ma amir talaina ka ma ra bobotoi.