1 Una valongore kaugu niaring, Luluai; una nuk pa kaugu lavur nilul vovo;

Una torom tagu, tago i dovot ma i takodo ra maukuam.

2 Ma koko u varvarkurai ure kaum tultul,

Tago pa ta na ta diat dia ki ra pia na takodo ta ra luaina matam.

3 Tago ra ebar i korot vakavakaina iau,

I tar rapue iau ura ra pia;

I tar vaki iau ta ra gunan i bobotoi, da diat dia tar mat amana.

4 Kari ra tulungeagu i matmat,

A nuknukigu i burut muka.

5 Iau nuk pa mule ra umana bung amana,

Iau nununuk ta kaum lavur mangamangana,

Iau nununuk ta ra kau i ra limam.

6 Iau tulue vaarike ra ura limagu piram;

A tulungeagu i mar up u da ra pia i mage. Sela.

7 Luluai, una pampam ma una torom tagu; a tulungeagu i tar bilua.

Koko una ive ra matam kan iau;

Kan ina varogop ma diat dia kuba ta ra Tung.

8 Na malana una tabar vamaur iau ma kaum varmari,

Tago iau rivarivan piram.

Una vaminana iau ta ra nga ba ina vanavana tana;

Tago ra tulungeagu i nuk up u.

9 Luluai, una valangalanga iau kan kaugu lavur ebar;

Iau vilau piram upi ina ki bakit tam.

10 Una vateten iau, upi ina pait ra nuknukim; tago u kaugu God;

A bo na Tulungeam na lue rap iau ta ra nga i tamataman.

11 Una valagar iau, Luluai, ure ra iangim;

Una ben vairop iau kan ra purpuruan, ta kaum mangamangana takodo.

12 Ma una vamutue kaugu umana ebar ta kaum ngala na varmari,

Ma una nila vue diat dia vakadik iau;

Tago iau kaum tultul.