1 Avat a pite pa ra Luluai.

Avat a pite pa ra Luluai arama ra bala na bakut;

Avat a pite pa ia arama liu.

2 Avat par kana lavur angelo, avat a pite pa ia;

Avat kana lavur kor, avat a pite pa ia.

3 Amur a matana keake ma ra gai, amur a pite pa ia;

Avat par a umana tagul ava pupua, avat a pite pa ia.

4 U ra lao arama liu kakit, una pite pa ia,

Damana bula avat ra lavur polo ta ra ul a bakut.

5 Boina ba diat a Pite pa ra iang i ra Luluai,

Tago i ga vartuluai, ma dia ga vana rikai.

6 I tar vatur vapadikat diat upi diat a tur tukum;

I tar pait ra varkurai ba pa na panie.

7 Avat a pite pa ra Luluai mara ra pia,

Avat ra lavur konakonom, ma avat ra lavur marumian na ta,

8 Ra iap ma ra bata na vatvat, a bata i pua, ma ra vual,

A ngala na vuvu bula nina ba i pait ot pa kana tinata,

9 A lualuana ma ra lavur ilil par,

A davai dia vuavuai ma ra lavur gatagal par,

10 A umana leing ma ra lavur vavaguai par,

A umana mangana dia kakao ra pia, ma ra lavur beo liuliu,

11 A umana king ta ra rakarakan a gunagunan ma ra lavur tarai par,

A umana luluai ma ra lavur tena varkurai par ati ra pia,

12 Diat par a umana barmana ma ra umana gara na vavina,

A umana patuana ma ra umana kuramana;

13 Boina ba diat a pite pa ra iang i ra Luluai;

Tago ia kaka ra iangina i ngala;

Kana minamar i ki akit ta dital ma ra rakarakan a gunagunan ma ra bala na bakut bula.

14 Ma i tar vangala ra ram u kana tarai,

Ma ra pite varpa kai kana umana tena lotu;

Maia, a tarai Israel iat, a tarai ba dia ki maravai pirana.

Avat a pite pa ra Luluai.