Iob.
12.
Ma Iob i ga tata ma i ga biti: 
A dovotina amutal iat a utul a matotono, Ma ba amutal a mat, a kabinana na mat varurung ma amutal. 
Ma iau bula, iau kabinana da amutal, Ma pa amutal manga kabinana tagu. To ia bar pa i nunure ra dari? 
A umana talaigu dia nongone iau, Iau a tutana nina God i ga valongore ba i ga kail tadav ia; A tena takodo, ma i ko kakit, go ra tutana dia nongone. 
Diat dia ki bulu dia nuk taun vue diat dia ki na malari, Dia to pin nina i to na bura. 
A umana tena nilong dia ki boina, Ma diat dia valar God dia ki bulu, Ma ra dekdek i diat, ia nam kadia god. 
Una tir ra umana leing ra pupui, ma diat a tovo u; Ma ra umana beo liuliu, ma diat a ve u; 
Una matoto ta ra rakarakan a gunaguna, ma una kapa tana; Ma ra umana en ta ra bala na ta diat a varvai piram. 
To ia bar ta diat pa i nunure Ba ra lima i ra Luluai i ga pait go? 
I kure ra lavur launa par, Ma ra nilaun kai ra tarai par. 
Dave, ra talinga i ta tikai pa i valar kilang ra umana tinata, Da ra karameana i dum kilang ra nian? 
A kabinana i ki pire ra umana patuana, Ma ra minatoto pire diat i lolokon kadia nilaun. 
A kabinana ma ra dekdek dir ki pire God, Ma ia iat i vatur vake ra minatoto ma ra kapa na ninunuk. 
Nam nina i re vue, pa da vatur pa mule; Ma nina i banu bat ia, pa da papa are mule. 
I tigal bat ra bata, ma ra umana tava alir dia ge; I tulue mule, ma dia lovon ta ra gunagunan. 
A dekdek ma ra kabinana dir ki pirana, I kure ra tena vartuam ma nina di tuam pa ia. 
I vapurpuruan ra umana tena varvateten, Ma i valunga ra umana tena varkurai. 
I pala vue ra umana vivi kai ra umana king, Ma i vi pit diat ma ra mal na vivi. 
I ben vavilavilau vue ra umana tena tinabar, Ma i vaikilik pa ra umana luluai. 
I vabombom ra umana melemuna ta ra tinata, Ma i vatuptup ra umana patuana. 
I manga kulume ra umana luluai, Ma i pala ra vipit kai ra umana tena ongor. 
A umana magit na pidik ta ra bobotoi i kap vaarike diat, Ma i ben vairop ra malur na minat tadav ra kapa. 
I vangala ra lavur vuna gunan, ma i nila vue bula diat; I vatababa ra lavur vuna tarai, ma i ben vavilavilau bula diat. 
I vapurpuruan ra nuknuk i ra umana luluai pire ra tarai ta ra rakarakan a gunagunan, Ma i varara diat ta ra bil ba pa ta nga tana. 
Dia paparai tupatupa ta ra bobotoi ba pa ta kapa tana, Ma dia papa lebalebe da ra tutana i longlong ta ra nimomo.