Iob.
26.
Ma Iob i ga tata ma i ga biti: 
U ga maravut davatane nina ba pa i ongor? U ga valaun davatane ra lima na binilua? 
U ti vala kapi ra varvateten pire nina ba pa i kabinana, Ma ra bo na minatoto bula! 
U ga tatata laka pire to ia? Ma u ga vaarike vang ra nuknuk i to ia? 
A umana tulungen dia dadadar Ara ta kadia gunan ta ra vavai na ta. 
A ruarua na tulungen i manga tapapa pirana, Ma pa ta tubatuba ta ra tavul a vinirua. 
I ga vuare ra bala na bakut ta ra maup aro ra matana labur, Ma i vataba ra rakarakan a gunagunan ta ra maup. 
I pulu bat ra tava ta kana umana bakut, Ma ra bakut pa i puongo tana. 
I tuba ra matana gai, Ma i talare kana bakut taun ia. 
I ga pait ra langun abara ta ra ul a ta, Ma i ga tibe varbaiane ra bobotoi kan ra kapa. 
A umana pagapaga ai ra bala na bakut dia dadadar Ma dia kaian ta kana vartigal. 
I ga vango ra ta ma ra dekdekina; I ga ubu Rab ta kana minatoto. 
I ga mar ra bakut ma kana ubar; Ra limana i ga go vakinkin ra vui, a tena vinilau. 
Ma go a ik a gamgavuna ka ta kana mangamangana; Ma ra magit da valongore ure, ia ra varmaianao i memeap uka! To ia laka i nunure rit ra dekdekina iat?