A Umana Kakailai.
3.
A kakailai kai David, ba i vilau kan natuna Absalom. Luluai, kaugu umana ebar dia tar peal! Mangoro dia tut na tur varbat ure iau. 
Mangoro dia biti ure iau dari: Pa ta maramaravut kai God pirana. Sela. 
Ma u, Luluai, u a ramravit kikil iau; U kaugu minamar, ma u vatur ra ulugu urama. 
Iau tangi tadav ra Luluai ma ra nilaigu, Ma i torom tagu maro ta kana luana gomgom. Sela. 
Iau ga va ma iau ga diop; Iau ga tavangun, tago ra Luluai i maramaravut iau. 
Pa ina burutue ra ngala na kor na tarai, Nina dia tur kikil bat iau. 
Luluai, una tut; una valaun iau, kaugu God. Tago u ga rapu ra pagupagu na ngie i diat par kaugu umana ebar, U tar bubur ra pal a ngie i ra umana tena varpiam. 
A valavalaun i tur uka pire ra Luluai; Kaum varvadoan na ki taun kaum tarai. Sela.