A Umana Kakailai.
10.
Luluai, ta ra ava u tur vavailik? Ta ra ava u ki ivai ta ra kilala na purpuruan? 
A tena varpiam i malamala ngala, ma di korot mur tuna ra luveana; Boina ba diat a virua mulai ta ra magit dia varpit ure. 
Tago ra tena varpiam i langlang ta kana lavur mamainga, Ma ra tena vavaranai i piam vue ra Luluai, ma i vul ia bula. 
A tena varpiam ba i kolakolo ra matana, i biti: Pa na titir upi ia. Kana lavur nuknuk dari: Pa ta God. 
Kana lavur mangamangana dia tur padikat vatikai; Kaum lavur varkurai dia ki na lao, pa i gire diat; Ma ure kana lavur ebar, i kulume diat. 
A nuknukina i dari: Pa ina takari; Pa ina ki kaina ta ra lavur taun tarai namur. 
A ngiene i buka ma ra tinata kakaina, ra vaongo ma ra tinata na arung varbat; A bilak na tinata ma ra kaina tinata dir ki ta ra vavai na karameana. 
I ki parau ta ra umana pia na pal, I doko ive diat ba pa dia rara; I makmakile ive diat dia vana tuna ka. 
I va parau da ra leon ta kana babang; I kiki uai upi na kinim ra luveana; I kinim pa ra luveana, ba i al pa ia ma kana ubene. 
I ki rokrok, ma i pa rururu, Ma diat dia vana tuna ka dia virua ta ra dekdekina. 
I biti dari: God i tar valubane; I ive ra matana, ma pa na gire. 
Una tut, Luluai; God, una vatur ra limam urama; Koko u nuk vue ra umana luveana. 
Ta ra ava ra tena varpiam na vul God, Ma na biti ba pa u titir upi ia? 
U tar gire, tago u gire ra bilak na magit ma ra varpiam upi una kure; Nina i ki tuna ka i nur tar mule tam; U tar maravut ra umana nat na ling ta ra lavur kilala i tar par. 
Una bubur ra lima i ra tena varpiam; Ma ure ra bilak na tutana, boina ba una tikan vue kana varpiam par, upi koko u gire mule ta na. 
Ra Luluai a king pa na mutu; A umana Tematana dia tar panie kan kana gunan. 
Luluai, u tar valongore ra mamainga kadiat i madu ra bala i diat; Una mal pa ra nuknuk i diat; una vatorome ma ra talingam; 
Upi una kure maravut ra umana nat na ling ma diat di arung bat diat, Upi koko ra tarai mati ra pia diat a ngangal mulai.