A Umana Kakailai.
30.
A kakailai; a kakailai ta ra pinapa na pal; kai David. Ina pite vangala pa u, Luluai; tago u tar al vatut iau, Ma pa u mulaot ba kaugu umana ebar diat a gugu ma iau. 
Luluai kaugu God, Iau ga tangi tadav u, ma u tar valagar pa iau. 
Luluai, u tar vatutua ra tulungeagu kan ra ruarua na tulungen; U tar valaun iau kan diat dia kuba ta ra tung na minat. 
Avat a kakailai na pite varpa tadav ra Luluai, avat kana umana tena lotu, Ma avat a tul tar ra pite varpa ta ra gomgom na iangina. 
Tago pa i kankan vavuan. Kana varmari i tur tukum. Kan ra tinangi na tur ba i marum, Ma ba i malana ra gugu na vana rikai. 
Ma iau, ba i tavua kaugu tabarikik iau ga biti: Pa ina takari muka. 
U Luluai, ure kaum varmari u tar vaki kaugu luana upi na tur dekdek; U ga ive ra matam, ma iau ga purpuruan. 
Iau ga kail u Luluai; Ma iau ga araring tadav ra Luluai dari: 
Ina topa ra ava ba ina kuba ta ra tung na minat? A tobon na pite pa u vang? Na vaarike vang kaum dovotina? 
Luluai, una valongore, ma una mari iau: Luluai, una maramaravut iau. 
U tar pukue kaugu niligur upi ra malagene; U tar pala vue kaugu mal na tabun, ma u vi pit iau ma ra gina; 
Upi ra minamar na kakailai na pite varpa tam, ma koko na ki mut. Luluai, kaugu God, ina pite pa u, ma pa na mutu.