A Umana Kakailai.
31.
Kai nina i lue ra kakailai; a kakailai kai David. Luluai, iau rivarivan tam; koko ina vavirvir ta tika na bung; Una valangalanga iau, tago u a tena takodo. 
Una kap talinga ba upi iau. una valangalanga lolole pa iau; Una da ra vat i ta piragu, da ra dekdek na pal na bakbakit ba ina laun tana. 
Tago u kaugu vat i ta ma kaugu pal na bakbakit; Ma ure ra iangim una ben iau, ma una tovo tar ra nga tagu. 
Una pala vue iau kan ra kun, nina di kapi ive upi iau; Tago u kaugu dekdek na pal na bakbakit. 
Ina nur tar ra tulungeagu ta ra limam; U tar kul valaun iau, Luluai, u ra dovot na God. 
Iau milikuane diat dia nuk pa ra lavur magit vavaongo; Ma iau nurnur uka tai ra Luluai. 
Ina gugu ma ina manga ga ta kaum varmari, Tago u tar gire ra magit i monong iau; U tar matoto ta ra lavur mangana i tup iau. 
Ma pa u ga tul tar iau ta ra lima i ra ebar, U tar vung ra kaugu ta ra pakana i maup. 
Una mari iau, Luluai, tago i tup iau ra nginarao; A matagu i papait na bilua ma ra tinangi, maia, ra tulungeagu ma ra pakagu bula. 
Tago iau vapar vue kaugu nilaun ma ra niligur, ma kaugu lavur kilala ma ra niriri; A dekdekigu i par vanavana ure kaugu varpiam, ma ra umana urugu dia panie. 
Tago i mangoro kaugu umana ebar, iau da ra magit na milmilikuan, Maia pa, ra umana talaigu dia manga milikuane iau, ma ra umana turagu dia burutue iau; Diat dia ga gire iau, dia vilau kan iau. 
Di tar valubane iau, da ra tutana i mat iau tar panie kan ra nuknuk i diat; Iau da ra la i tapamar. 
Tago iau tar valongore ra varvul mangoro dia varvul me; A ururian i tur kikil iau ta ra lavur papar. Ba dia varpit ure iau, Dia nuk tadav ta mangamangana ba ina virua tana. 
Ma ga iau, iau nurnur uka tam, Luluai; Iau ga biti dari: U kaugu God. 
U kure kaugu kini; Una valaun iau kan ra lima i kaugu umana ebar ma kan diat dia vakaina iau. 
Boina ba ra matam na pupua taun kaum tultul; Una valaun iau ta kaum varmari. 
Luluai, koko ina vavirvir, tago iau tar kail u; Boina ba ra umana tena varpiam diat a vavirvir, Ma diat a ki mut ta ra ruarua na tulungen. 
Boina ba ra umana tena vaongo diat a bombom, Nina dia nguk ma ra tinata ure ra tena takodo, I kolakolo ra nuknuk i diat ma dia milmilikuan bula. 
I ti ngala mat kaum varmari, nina u vung vake pi kadiat dia ru u, Nina u pait ia ta diat dia nurnur tam Ta ra luaina mata i ra tarai! 
Una ga ive diat ta ra rivarivan ta ra luaina matam kan ra varpit kai ra tarai; Una ga vabakite diat ta ra pal na mal kan ra tinata na vartoto. 
Da pite pa ra Luluai, Tago i tar vaarike kana enana varmari tagu ta ra dekdek na pia na pal. 
Ma iau, ta kaugu nirut, iau ga biti dari: Di tar vamutue iau ta ra luaina matam; Ma u ga valongore ke kaugu lavur nilul vovo, Ba iau ga tangi tadav u. 
Avat a mari ra Luluai, avat par kana tarai na lotu; Ra Luluai i vaale bat ra dovot na tarai, Ma i manga balbali pire diat dia malamala luluai. 
Avat a ongor, ma koko avat a burut, Avat par ba ava nurnur upi ra Luluai.