A Umana Kakailai.
33.
Avat a umana tena takodo, avat a ngenge ma ra gugu tai ra Luluai; A pite varpa i topa ra dovot na tarai. 
Avat a pite pa ra Luluai ma ra pagol; Avat a kakailai na pite varpa pirana ma ra pagol ba a vinun na vinau tana. 
Avat a kakaile ra kalamana kakailai pirana, Avat a ubuubu mal ra pagol, ma avat a manga ongor tana. 
Tago ra tinata kai ra Luluai i takodo, Ma kana lavur papalum par i dovot. 
I mainge ra ko na mangamangana, ma ra takodo na varkurai. A gunagunan i kor ma ra varmari kai ra Luluai. 
A tinata kai ra Luluai i vaki ra maup arama liu, Ma ra lavur kor na magit tana i vana rikai ta ra vuvu na ngiene. 
I varurue ra polo na ta da ra anguvai; I vung vake ra ngala na tava da ta ra pal na vuvuvung. 
A rakarakan a gunagunan par na ru ra Luluai; A tarai par ta ra rakarakan a gunagunan diat a burut i tana. 
Tago ia iat i ga tata, ma di pait ia ka; la iat i ga vartuluai, ma i tur rikai bulu. 
Ra Luluai i noe vue ra mamainga kai ra lavur Tematana; I tur bat ra nuknuk i ra tarai par. 
A nuknuk i ra Luluai i tur bulu vatikai, Damana bula ra nuknuk i ra balana pire ra lavur taun tarai namur. 
I ti doan nam ra vuna tarai ba ra Luluai ia kana God; Nam ra tarai ba i ga pilak pa diat upi diat kana tiniba. 
Ra Luluai i gigira ba marama ra bala na bakut; I gire ra lavur natu i ra tarai; 
Marama iat ta ra kubana i gire Ra lavur tarai ati ra pia; 
Maia, nina iat, ba i mal pa ra bala i diat par, Ma i nuk pa kadia lavur papalum. 
A king pa i laun ure ra ngala na loko na tarai, Ma a rangrang na tutana pa i laun ta ra ngala na dekdekina. 
A os i mama valavalaun; Ma pa i valangalanga ta tikai ure ra ngala na ongorina. 
Ea, a mata i ra Luluai i mataure diat dia ru ia, Ma diat dia ki nunur upi kana varmari; 
Upi na valangalanga ra tulungea i diat kan ra minat. Ma na tabar valaun diat ta ra mulmulum. 
A tulungea i dat i tar ki nunur upi ra Luluai; Ia iat kada maramaravut ma kada. ramravit. 
Tago ra bala i dat na manga gugu tana, Tago da tar nurnur ta ra gomgom na iangina. 
Luluai, boina ba kaum varmari na ki pire vevet, Tago ave tar nurnur tam.