A Umana Kakailai.
36.
Kai nina i lue ra kakailai, kai David, a tultul kai ra Luluai. A varpiam i varvai dari ta ra bala i ra tena varpiam ba Pa ta bunurut ure God ta ra luaina matana. 
Tago i manane vavaongo pa ia ta ra luaina matana, dari: Ba pa da gire tadav kana varpiam, ma pa da milikuane. 
A tinata nina i irop ta ra ngiene i kaina ma i vavagu; Pa i kabinana mulai upi na pait ra boina. 
I nuk vaninare ra kaina ta kana vava, Imur ra nga ba pa i boina; Pa i milikuane ra kaina. 
Luluai, kaum varmari i tuk tar urama ra bala na bakut; Kaum dovot na mangamangana i tuk ta ra ul a bakut iat. 
Kaum mangamangana takodo i da ra lualuana kai God, Kaum lavur varkurai dia da ra ngala na marumian; Luluai, u vaale bat ra tarai ma ra lavur leing bula. 
God, kaum varmari i ti ngatngat tuna! Ma ra umana natu i ra tarai dia rivarivan ta ra malur na bebeam. 
Diat a maur tuna ma ra bira ta ra kubam; Ma una ga vamomo diat ma ra tava na gugu piram. 
Tago ra vunapai ra nilaun i tur piram, Ma ta kaum kapa ave na ilam tadav ra kapa. 
Koko una ngo ma kaum varmari pire diat dia nunure u; Ma kaum mangamangana takodo na vala tadav diat i dovot ra bala i diat. 
Koko nina i malamala luluai na rua vakaina iau, Ma koko ra tena varpiam na korot vue iau. 
A umana tena varpiam dia tar bura; Di tar rapue diat, ma i dekdek upi diat a tut mulai.