A Umana Kakailai.
63.
A kakailai kai David, ba i ga ki ta ra bil Iuda. God u kaugu God, ina ongor ma ra tinikan up u; A tulungeagu i mar up u, A pakagu bula i kaina up u, Ta ra gunan i mage ma i bil ika, ma pa ta tava tana; 
Damana iau ga bobe vamat u ta ra pal tabu, Upi ina na tadav ra dekdekim ma tadav kaum minamar. 
Tago kaum varmari i boina ta dir ma ra kini ati ra pia; A bul na ngiegu na pite pa u. 
Damana ina pite pa u ba iau laun boko; Ina tulue ra limagu urama ure ra iangim. 
A tulungeagu na ti maur da ma ra luku na ur ma ra bira; A ngiegu na pite pa u, ma ra bul na ngiegu na mugur; 
Ba iau nuk pa u ta kaugu vava, Ina nununuk ure u ba iau vangala ka tuk ra keake; 
Tago u tar maravut iau, Ma ta ra malur na bebeam ina ngenge ma ra gugu. 
A tulungeagu i ki petep piram, A limam tuna i vatur vake iau. 
Ma diat dia mainge ba diat a doko iau, Diat a kuba ura iat ta ra bala na pia. 
Diat a virua ta ra pakat na vinarubu; Diat a tiniba kai ra umana kuabar na pap. 
Ma ra king na gugu tai God; Diat par dia vavalima tana diat a langlang; Ma ra ngie i ra umana tena vaongo da ang bat ia boko.