A Umana Kakailai.
90.
A niaring kai Moses ra tutana kai God. Luluai, u kaveve rivarivan ta ra lavur taun tarai par. 
Ba pa di ga pait vaarike boko ra lavur lualuana, Ma ba pa u ga vaki boko ra pia ma ra rakarakan a gunagunan, U muka God u tar ki, pa ta vunapaim ma pa ta mutuaim. 
U kure ra tarai ma dia lilikun ta ra tobon; Ma u biti: Avat a talil, avat a lavur natu i ra tarai. 
Tago ra arip na marmar na kilala dia varogop piram ma nabung uka ba i par, Ma dia da ra nimono na marum. 
U kapkap vue diat da ra lovon ta; dia varogop uka ma ra nidiop; Na malana dia da ra vura i gol; 
Na malana i lubalubang, ma i tavua; Na ravian di doko pa ia, ma i makuk; 
Tago kaum kankan i vaimur avet, Ma ave purpuruan tuna ta ra karangap i kaum kankan. 
U tar vung vaarike kaveve lavur varpiam ta ra luaina matam, Ma kaveve lavur varpiam ba i tur ivai, u tar vung diat ta ra talapar i ra matam. 
Tago kaveve nilaun i panie ke ta kaum kulot, Ma ave vapar vue kaveve kilakilala da ra oir. 
Kaveve kini ati ra pia i varogop ma lavurua na vinun na kilakilala, Ma ba i ongor ra paka i vevet, kan na varogop ma lavutul na vinun na kilakilala; Ma ra dekdek na papalum ma ra niligur i vana rikai ta kadia minamar, Tago i par lulut, ma ave vilau ka. 
To ia i nunure ra dekdek i kaum kankan, Ma ia i nunure kaum kulot upi na tul tar ra variru tam ba na topa u? 
Una tovo mal avet, upi avet a nuk pa ra mutuai kaveve nilaun, Ma avet a ongor upi na kapa ra bala i vevet. 
Aivia boko ra bung dari? Una lilikun, Luluai, Ma una mari mule kaum umana tultul. 
Una vamaur lulut avet ma kaum varmari, Upi avet a kukula na gugu, ma avet a ga ta kaveve nilaun par. 
Una vagagane avet, upi kaveve umana bung na gugu diat a varogop ma ra lavur bungbung u ga valigur avet i tana, Ma ra lavur kilala ave ga malari tana. 
Una vaarike kaum papalum pire kaum umana tultul, Ma kaum minamar tadav ra umana natu i diat; 
Ma boina ba ra minamar kai ra Luluai kaveve God na ki ta vevet; Ma una vatavua ra papalum na lima i vevet, Maia, una vatavua ra papalum na lima i vevet.