A Umana Kakailai.
104.
A tulungeagu, una pite pa ra Luluai. Luluai kaugu God, u ti ngala tuna; U vavauluvai ma ra variru ma ra ngala na minamar. 
U pulu mule u ma ra kapa da ma ra olovoi; U vung pala ra lao da ra mal na turturup; 
U vung ra vabolo ure ra kubam arama liu ta ra vual; U pilak pa ra umana bakut upi diat kaum kiki na vinavana; U vanavana ta ra ul a bebea i ra vuvu. 
U vaki kaum lavur angelo upi dia da ra vuvu, Kaum umana tultul upi dia da ra biro na iap; 
U ga page vadekdek ra rakarakan a gunagunan, Upi koko na takari vatikai namur. 
U tuba ma ra lamanana da ma ra olovoi; A umana buabuana dia ga dudu ta ra polo; 
A polo i ga takap ta kaum varbor; I ga vilavilau ta ra nilai kaum pangpagur, 
Upi ra kiki u ga mal pa ia ure; A umana lualuana dia ga vana rikai, ma ra umana male dia ga kuba. 
U ga pait ra langun ba pa dia bolo lake tana. Upi koko diat a lilikun mulai upi diat a tuba ra gunagunan. 
U tulue vaarike ra umana mata na tava ta ra malamale, Dia noranoro limlivuan ta ra lualuana. 
A umana king ta ra pupui dia momamomo, A umana kuabar na as dia maur tana. 
A umana beo liuliu dia poapo maravai tana, Ma limlivuan ta ra mapina davai dia vivigul. 
U tabatabar ra lualuana ma ra tava marama ra kubam; A pia i maur ma ra vuai kaum lavur papalum. 
U vatavua ra vura upi a.i ra umana vavaguai; Ma ra umana davadavai upi diat a topa ra tarai; Upi diat a vatur vake ra adia magit na nian ta ra pia; 
Ma ra vain upi na vagagane ra nuknuk i ra tarai, Ma ra vaivai upi na vatavaliran ra mata i diat, Ma ra gem upi na vaongor ra bala i diat. 
A umana davai kai ra Luluai dia maur ma ra bata, A umana tagatagal aro Lebanon nina i ga vaume diat; 
Nam ba ra umana beo dia poapo tana; Ma ra mou i ki ta ra iara. 
A umana kuabar na me dia bakitai ta ra lualuana i manga tuluai, Ma ra mang i paraparau livuan ta ra umana vat; 
U vaki ra gai upi na tibe ra kilala, Ma ra matana keake i nunure kana kukuba. 
U vabobotoi ra gunan, ma i marum, Nam ba ra lavur kuabar ra pupui dia kakao rikai tana. 
A umana nat na kon dia kukukula upi ra adia magit, Ma dia tikatikan upi ra adia nian pire God. 
Ba ra keake i kuma rikai dia vana kariu, Ma dia va mulai ta kadia babang. 
A tarai dia vana oai upi kadia papalum, Ma upi kadia bibili tuk tar ta ra ravian. 
Luluai, i peal tuna kaum lavur papalum! U tar pait diat par ma ra kabinana; A rakarakan a gunagunan i kor ma kaum lavur vavaki. 
A ta i ki abara, i ngala ma i tababa, A peal mangana dia kakakao tana, dia vurot, A lavur mangana dia laun, a umana ikilik ma ra umana ngala. 
A umana parau dia vanavana ta ra ul a ta, A konakonom oaga i ki tana, nina u ga pait ia upi na limlibur ie. 
Go diat par dia ki pa u, Upi una tabar diat ma ra adia magit a bungbung par. 
U tabar diat, ma dia varuruai, U pala ra limam, ma dia maur ma ra bo na magit. 
U kuvang ra matam, ma dia ki kaina; U tigal bat ra vuvu na bilau i diat, ma dia mat ika, Ma dia lilikun upi ra tobon i diat. 
Ba u tulue ra tulungeam dia laun, Ma u pait vakalamane ra mata i ra rakarakan a gunagunan. 
Boina ba ra minamar i ra Luluai na tur tukum, Boina ba ra Luluai na gugu ta kana lavur papalum! 
Nina i gire ung ra rakarakan a gunagunan, ma i dadadar; I bili ra lualuana, ma dia vuvuvul. 
Ina kakailai tadav ra Luluai ta kaugu nilaun par; Ina kakailai na pite varpa tadav kaugu God ta ra lavur kilala ba iau kiki ati ra pia. 
Boina ba kaugu ninunuk na kalakalami pirana; Ina gugu tai ra Luluai. 
Boina ba ra umana tena pait ra kaina diat a virua kan ra rakarakan a gunagunan, Ma koko ra umana tena varpiam diat a ki mulai ati. A tulungeagu, una pite pa ra Luluai. Avat a pite pa ra Luluai.