A Umana Kakailai.
115.
Koko avet, Luluai, koko avet a vatur vake ra pite varpa; Una tul tar ia ta ra iangim iat, Ure kaum varmari, ma ure ra dovot na maukuam. 
Upi ra ava a umana Tematana dia biti dari: Akave kadia God? 
Kada God i ki ka ra bala na bakut; I tar pait ra lavur magit i ga mainge. 
Kadia lavur tabataba di ga pait diat ma ra silva ma ra goled ika, A tarai ka dia ga pait diat. 
Dia vung ra ngie i diat, ma pa dia tata; A kiau na mata i diat, ma pa dia gigira; 
A talinga i diat, ma pa dia valavalongor; A bilau i diat, ma pa dia lulung; 
A lima i diat, ma pa dia bibili; Dia vung ra kau i diat, ma pa dia vanavana; A kongkong i diat, ma pa ta nilai diat. 
Ma diat dia pait diat dia varogop vanavana ma diat; Ma damana bula diat par tikatikai dia nurnur ta diat. 
Israel, una nurnur tai ra Luluai! Ia kaka kadia tena maramaravut ma kadia ramravit. 
Avat a tarai Aron, avat a nurnur tai ra Luluai! Ia kaka kadia tena maramaravut ma kadia ramravit. 
Avat ava ru ra Luluai, avat a nurnur tai ra Luluai! Ia kaka kadia tena maramaravut ma kadia ramravit. 
Ra Luluai i ga nuk pa dat, ma na vadoane dat; Na vadoane ra tarai Israel; Na vadoane ra tarai Aron; 
Na vadoane diat dia ru ra Luluai, Diat par a umana ikilik ma ra umana ngala. 
Ra Luluai na vapeal avat, Avat ma ra umana natu i vavat. 
Ra Luluai na vadoane avat, Nina i ga vaki ra bala na bakut ma ra rakarakan a gunagunan bula. 
A bala na bakut kai ra Luluai, Ma ra rakarakan a gunagunan i ga tul tar ia tai ra tarai. 
A umana minat pa diat a pite pa mule ra Luluai, Ma diat bula dia kuba ta ra gunan na minat, pata. 
Ma dat, dat a pite pa ra Luluai Papa gori ma pa na mutu. Avat a pite pa ra Luluai.