A Umana Kakailai.
120.
A kakailai na nitutua. Ba iau ga ki na malari iau ga kail tadav ra Luluai, Ma i ga torom tagu. 
Una valaun iau, Luluai, kan ra tena vavaongo, Ma kan ra tena vavagu. 
Ava da tul tar ia tam? Ba ava da pait ia piram, U ra tena vavagu? 
A umana pu, a umana lamiana, kai ra tena vinarubu, Ma ra lakit na iap. 
I kaina tagu tago iau ki na vaira ati Mesek, Ma ra kubagu i tur livuan ta ra umana pal na mal Kedar! 
A tulungeagu i ga ki vavuan Pire nina i milmilikuane ra malmal. 
Iau mainge ra malmal; Ma ba iau tatata dia mainge ke ra vinarubu.