A Umana Kakailai.
139.
Kai nina i lue ra kakailai; a kakailai kai David. Luluai, u tar pepeng ta ra balagu, ma u tar matoto tagu. 
U nunure ba iau ki, ma ba iau tur; U matoto ta ra nuknukigu ba iau ki vavailik. 
U tar gire valar pa kaugu vinavana ma kaugu nidiop, Ma u tar vinar ta kaugu lavur mangamangana. 
Tago pa ta kopono tinata ta ra ngiegu, Ba pa u nunure rit ia, u Luluai. 
U ki na lua, ma u ki namur tagu, Ma ra limam i vatur vake iau. 
A kabinana dari i ti enana tuna piragu, I ti akit, ma i dekdek upi ina matoto tana. 
Ina vana uve kan ra Tulungeam? Ma ina lop uve upi koko ina gire ra matam? 
Ba iau tutua urama ra bala na bakut, u ki ie; Ba ina mal kaugu ta vava ta ra ruarua na tulungen, ea, u ki bula abara. 
Ba iau alalir ma ra bebea i ra lar, Ma ba ina ki ta ra langun na ta aro iat; 
Abara bula a limam na ben iau, Ma ra limam tuna na vatur vake iau. 
Ba iau biti: A dovot, kan ra bobotoi na nonoe bat iau, Ma kan ra kapa kikil iau na marum uka; 
Ra bobotoi iat pa i noe bat iau tam, Ma ra marum i pupua da ra keake; A bobotoi ma ra kapa dir par dir varogop piram. 
Tago u iat u ga mal pa ra balagu, U ga pakan guve iau ta ra bala i nagu. 
Ina pite pa u tago u ti enana kakit, Ma kaum lavur papalum dia enana muka; Ma ra balagu i nunure bulu. 
A urugu pa i tur ivai kan u Ba di mal vapidik iau, Ma ba di alur kapi iau ara iat ra bala na pia. 
A matam i tar gire ra pakagu ba pa i ko boko; Ma di ga tar tumu ra lavur bung par ta kaum buk, Maia, a lavur bung di ga kubu diat, Ba pa ta na boko ta diat i ga vana rikai. 
God, kaum lavur nuknuk dia ngatngat piragu, Dia vurot muka. 
Gala ina to diat, gala na tup ia ma ra veo pata; Ba iau tavangun iau ki boko piram. 
God, boina ba una ubu ra umana tena varpiam! I boina avat a vana kan iau, avat a umana tena vardodoko. 
Tago dia tut na varpiam ure u, Ma kaum lavur ebar dia vatang ra iangim. 
Luluai, pa iau milmilikuane vang diat dia milikuane u? Ma pa i takunuan ra balagu bar ure diat dia tut na varpiam ure u? 
Iau milikuane diat ma ra milmilikuan tuna; Ave ki na ebar ma diat. 
God, una pepeng ta ra balagu, ma una matoto ta ra nuknukigu; Una valar pa iau, ma una matoto ta kaugu lavur ninunuk; 
Ma una gire ba ta kaina mangamangana tagu, Ma una ben iau ta ra nga na nilaun tukum.