A Umana Kakailai.
140.
Kai nina i lue ra kakailai; a kakailai kai David. Luluai, una valaun iau kan ra kaina tarai; Una vaale bat iau kan ra umana tena vinarubu; 
A bala i diat i nuk upi ra varpiam, Ta ra bungbung par dia varvargat upi ra vinarubu. 
Dia tar vamangi ra karamea i diat upi na da ra karamea i ra vui; A taring da kai ra varkarat na vui i ki ta ra vavai na bul na ngie i diat. Sela. 
Luluai, una balaure bat iau kan ra lima i ra tena varpiam, Una vaale bat iau kan ra tena vakavakaina; Nina dir mainge ba dir a vabura iau ta kaubu vinavana. 
Diat i kolakolo ra nuknuk i diat dia tar kapi ive ra kun ure iau, ma dia tar vung ive ra palai; Dia tar vuare ra ubene ta ra papar a nga; Dia tar vung ra ben ure iau. Sela. 
Iau ga biti tai ra Luluai: U kaugu God; Luluai, una valongore kaugu lavur nilul vovo. 
Luluai, God, kaugu dekdek na valavalaun, U tar turup ra ulugu ta ra bung na vinarubu. 
Luluai, koko una tul tar ra magit dia mainge ta ra umana tena varpiam; Koko una maravut ra kaina nuknuk i diat. Sela. 
Ba diat dia kobot upi iau dia tonatonok, Boina ba kadia kaina tinata na tup diat iat mulai. 
Boina ba ra lakit na iap na bura taun diat da ra bata; Boina ba da vue tar diat ta ra iap, Ma ta ra ngala na tung, upi koko diat a tutua irop mulai. 
A tena varvul pa na ki bulu ta ra rakarakan a gunagunan, Ma ra kaina na rovoi upi ra tena vakavakaina upi na virua. 
Iau nunure ba ra Luluai na maravut diat dia ki na malari, Ma na pait ra magit i takodo pire ra luveana. 
A dovotina ra umana tena takodo diat a pite pa ra iangim; Ma diat i dovot ra bala i diat diat a ki ta ra luaina matam.