Tinata Valavalar.
15.
A tinata na varmaram i pun vue ra kankan, Ma ga ra dekdek na tinata i vuna ta ra karvuvu. 
A karamea i ra tena kabinana i tatike mal ra tinata na minatoto, Ma ga ra ngie i ra lunga i lingire ra tinata na papaua. 
A mata i ra Luluai i gire ra lavur gunagunan par, Ma i makmakile ra umana kaina ma ra umana boina. 
Ba ra karamea i dat i varmaram i da ra davai na nilaun, Ma ba i rara ra tulungea i dat na kinkin tana. 
A lunga i pue vue ra varvateten kai tamana, Ma ga nina ba i kapupi ra varpit i kabinana. 
Ta ra kuba i ra tena takodo i ngala ra tabarikik, Ma na kaina ra vapuak kai ra umana tena varpiam. 
A ngie i ra umana tena kabinana i imimire ra kabinana, Ma ga ra bala i ra umana lunga pata. 
A vartabar kai ra umana tena varpiam i da ra magit na milmilikuan pire ra Luluai, Ma i manga gugu ka ta ra niaring kai ra dovot na tarai. 
A mangamangana kai ra tena varpiam i da ra magit na milmilikuan pire ra Luluai, Ma i mari ka nina i mur ra mangamangana takodo. 
Nina i vana kan ra nga na tabun boko ta ra varpit, Ma nina i milikuane ra varpit na virua. 
A ruarua na tulungen ma ra tavul a vinirua dir tur ta ra luaina mata i ra Luluai, Damana muka ra bala i ra tarai bula! 
A tena varkulumai pa i mainge ra varpit, Ma pa i vana tadav ra umana tena kabinana. 
Ba i gugu ra bala i dat, na barbar ra mata i dat; Ma ga ba i tabun ra bala i dat, ra tulungea i dat i kinkin. 
Ba tikai i kapa ra nuknukina, i tikatikan upi ra kabinana; Ma ra ngie i ra umana lunga i nga ra magit na papaua. 
A biaui i ki na malari ra bungbung par, Ma ga nina i lagar i lukalukara vatikai. 
I boina ba da vatur ra ikilik na tabarikik ika varurung ma ra variru tadav ra Luluai, Ma pa i boina ba da vung ra ngatngat na vurvur magit varurung ma ra purpuruan. 
Ba da en ra vurigir ma da varmari tana i boina, Ma ra monoina bulumakau varurung ma ra milmilikuan pa i boina. 
A tena kulot i vuna ta ra varpuapuai, Ma nina i vavabing ma ra kankan i vango ra varngangar. 
A kait i tavua ta ra nga kai ra tabauma, Ma ga ra nga kai ra tena takodo i tamataman. 
A bul a tena kabinana i vagugu tamana, Ma ga ra papaua i pidimuane nana. 
A lunga i gugu ta ra papaua na mangamangana, Ma ga ra tutana ba i kabinana i mal vatakodo kana vinavana. 
Ona pa da pirpir guvai, pa da pait ot pa ra umana varkurai; Ma ona i peal ra umana tena varvateten da pait valar pa diat. 
A tutana i gugu ta kana tinata na balbali, Ma ba di tatike ra tinata ta ra kilalana iat, i boina tuna nam. 
A tena kabinana i vana ta ra nga na nilaun urama, Upi na vana kan ra ruarua na tulungen ara iat. 
A Luluai na rubat vue ra kuba i nina i ngala ra nuknukina ure mule. Ma na vatur vapadikat ra langun kai ra ua na vavina. 
A lavur kaina nuknuk dia da ra magit na milmilikuan pire ra Luluai, Ma ra mari na tinata i gomgom. 
Nina i vakavakaina upi na vangala kana tabarikik i vakaina ra kubana iat, Ma ga nina i milikuane ra kul varbat na ti laun. 
A bala i ra tena takodo i nuk vaot ra tinata na balbali, Ma ga ra ngie i ra tena varpiam i lingire vaarike ra umana kaina mangana tinata. 
A Luluai i ki vailik kan ra umana tena varpiam, Ma i torom ta ra niaring kai ra umana tena takodo. 
Ba ta magit i vakapa ra mata i dat, a bala i dat i gugu tana; Ma ba da valongore ra bo na magit, a uru i dat i lagar tana. 
Nina i valongore ra varpit ure ra nilaun, Ma ki livuan pire ra umana tena kabinana. 
Nina i ole ra varvateten i pidimuane ra tulungeana iat, Ma ga nina i kapupi ra varpit na matoto tana. 
A variru tadav ra Luluai i vuna ta ra kabinana, Ma ra kini vovovon na vuna ta ra variru.