Tinata Valavalar.
16.
A ninunuk ta ra bala i diat, a magit kai ra tarai; Ma ga ra Luluai i tul tar ra tinata na balbali ta ra ngie i dat. 
A lavur mangamangana kai ra tutana dia gomgom ta ra luaina matana. Ma ga ra Luluai i valar ra nuknuk i ra tarai. 
Una nur tar kaum lavur papalum tai ra Luluai, Ma da ga pait ot pa ra umana magit u ga nuk pa ia. 
A Luluai i ga pait ra lavur magit ure kadia papalum tikatikai, Ma ra tena varpiam iat ure ra bung na vinirua. 
Diat par ba i ngala ra nuknuk i diat ure diat mulai, ra Luluai i milikuane diat; A dovotina muka, a varkurai na tadav diat. 
Di varkul ure ra varpiam ma ra varmari ma ra dovotina, Ma ba di ru ra Luluai a tarai dia vana kan ra varpiam. 
Ba ra Luluai i manane ra mangamangana kai ta tikai, I vamaram guve diat ma kana lavur ebar bula. 
A ikilik na tabarikik ba i tur varurung ma ra mangamangana takodo I boina ta dir ma ra ngala na vapuak varurung ma ra mangamangana ba pa i takodo. 
A tutana i nununuk upi ra nga ba na vana tana, Ma ra Luluai i vateten tar kana vinavana tana. 
A mamat na tinata i arikai ta ra ngie i ra king, Ba i varkurai ra ngiene pa na rara. 
A takodo na valavalar ma ra takodo na mamat dir vuna tai ra Luluai, Ia iat i ga pait ra lavur mamat ta ra kakakap. 
A umana king dia milmilikuane tuna ra kaina mangamangana, Tago ra kiki na king i tur dekdek ta ra mangamangana takodo. 
A umana king dia manga gugu ta ra takodo na tinata, Ma dia manane nina ba i ko kana pirpir. 
A kankan kai ra king i da ra tena varvai ure ra minat, A tena kabinana i vamaram pa ia. 
Ba ra king i matana varmari i da ra nilaun, Ma kana varmananai i da ra bakut na bata. 
A niongor upi ra kabinana i boina ta dir ma ra niongor upi ra goled; I boina ba da pilak pa ra niongor upi ra minatoto, ma koko ra niongor upi ra silva. 
A nga kai ra dovot na tarai i vana irai kan ra varpiam; Nina i balaure kana vinavana i vaale bat kana nilaun. 
A mangamangana kolakolo i lua, namur ra vinirua; Ma ra papait na luluai i lua, namur ra bunura. 
I boina ba na madu ra bala i dat varurung ma ra umana luveana, Ma pa i boina ba da kale ra magit di ga ra pa ia varurung ma diat dia papait na luluai. 
Nina i nuk pa ra tinata na tikan tadav ra boina, Ma nina i nurnur tai ra Luluai i ti doan. 
Nina i kabinana ra nuknukina da vatang ia ba a matotono, Ma ba i kalakalami ra tinata a vartovo na tavua. 
Ba tikai i vatur vake ra minatoto i da ra mata na nilaun pirana, Ma ra papaua kai ra umana lunga i vakadik diat. 
A nuknuk i ra tena kabinana i vateten ra ngiene, Ma i vanot kana pirpir ma ra kabinana. 
A mari na tinata i da ra polo na livur, I kalakalami ta ra bala i dat, ma ra uru i dat i lagar tana. 
Tika na nga a tarai dia biti ba i takodo, Ma ra tukuna i tadav ra minat. 
A mamainga kai ra tena papalum upi ra magit i vuna ta kana niongor, Tago ra mulmulum i varvargat ia. 
A tutana vakuku i nuknuk upi ra kaina, Ma kana tinata i maramararang. 
A tavir na tutana i imire vurvurbingitane ra varngangar, Ma ra tena varmaianao i varbaiane diat dia ki na bartalaina tuna. 
A tena vakavakaina i lam pa talaina, Ma i agur pa ia ta ra nga ba pa i boina. 
Nina i vapula bat ra matana i nununuk upi ra magit i gegagege, Nina i paum bat ra bul na ngiene i pait ot pa ra varpiam. 
Ra ulu i nina i kua i da ra kere na minamar, Da tikan tadav ia ta ra nga na mangamangana takodo. 
Nina i vavabing ma ra kankan i boina ta dir ma ra lebe, Ma nina i kure bat ra nuknukina i boina ta dir ma nina i uvia pa ra pia na pal. 
Di padapadailam upi ra magit, Ma kai ra Luluai ka ra varkurai tuna tana.