Tinata Valavalar.
18.
Nina i kiki irai i nuk pa kana mamainga iat, Ma i varngangar ma ra lavur dovot na kabinana par. 
A lunga pa i gugu ta ra minatoto, I mainge ke ba na vaarike ra nuknukina iat. 
Ba ra tena varpiam i pot, a milmilikuan bula i pot; Ma ra vavirvir dir vut varurung ma ra varvul. 
A tinata kai ra tutana i da ra tava i lubu; A vunapai ra kabinana i da ra tava alir. 
Pa i boina ba da mari ra tena varpiam ta ra varkurai, Ma damana bula pa i boina ba da okole vue ra tena takodo. 
A ngie i ra lunga i vuna ta ra varpuapuai, Ma kana tinata i vuna ta ra varkita. 
A tinata kai ra lunga. i vuna ta kana vinirua, Ma ra ngiene i da ra kun ure ra tulungeana. 
A lavur tinata kai ra tena varmaianao dia da ra magit i kalakalami, Dia ruk tara bala i ra tarai ara iat. 
Nina i talatalanguan ta kana papalum Dir turana ma ra tena varli. 
A iang i ra Luluai i da ra dekdek na pal na bakbakit; A tena takodo i vilau tar tana ma i ki bulu tana. 
A tabarikik kai ra uviana i da ra dekdek na pia na pal pirana, Ma ia iat i nuk ia ba i da ra ngala na liplip pirana. 
Lua ta ra vinirua ra nuknuk i ra tarai i malamala ngala; Ma ra kini vovovon i lua, namur ra variru. 
Ba tikai i tata balbali ma pa i valongore boko ra tinata, I da ra magit na papaua ma ra vavirvir pirana. 
A tulungea i ra tutana i puak pa kana binilua, Ma to ia na puak pa ra tulungea i nina ba i tabun? 
A bala i ra matotono i varurue ra kabinana, Ma ra talinga i ra tena kabinana i titatikan upi ra minatoto. 
A vartabar kai ta tikai i mal are kana nga, Ma i ben pa ia ta ra luaina mata i raumana ngala. 
Ba tikai i lua ma ra tinata na vartakun, di biti ba kan i takodo, Tuk tar nam ba kana ebar i vut ma i tir ia. 
A padapadailam i vango ra varngangar, Ma i varkurai livuan ta ra umana luluai. 
Ba da maravut tura i dat i da ra ongor na pia na pal, Ma ra umana vargegelenai dia da ra okobat ta ra pal na bakbakit. 
A bala i ra tutana na ti maur ma ra vuai ra ngiene; Na ti maur ma ra vabongon ure kana tinata. 
A karamea i ra tarai i vuna ta ra minat ma ta ra nilaun, Ma diat dia manga tata diat a en ra vuaina. 
Nina dir taulai ma ra bo na vavina i tar tikan tadav ra bo na magit, Ma i tar vatur vake ra varmari kai ra Luluai. 
A luveana i lulul uka, Ma ga ra uviana i ngangar kana tinata na balbali. 
Ba tikai dia bartalaina ma ra tarai par, pa na boina tana; Ma ga tika na talai dat i ki, ma i manga ki petep ta dir ma tura i dat.