Tinata Valavalar.
19.
A luveana ba i dovot kana mangamangana i boina Ta dir ma ra tutana ba i bilak kana tinata ma i papaua bula. 
Damana bula, ba ra bala i dat i tuptup pa i boina, Ma nina ba i vana rurut na rara. 
Ba ra tutana i vakaina kana nga ma ra mangamangana tuptup, A balana i urur ure ra Luluai. 
Ba tikai i uviana, mangoro dia talaina me; Ma ra luveana, talaina i vana kan ia ka. 
A varkurai na tadav ra tena varvai ba i tavir, Ma nina ba i vatang ra vaongo pa na pila ta ra balbali. 
Mangoro dia lulul ra tena varmari, Ma ra tarai par dia talaina ma ra tena vartabar. A umana turana par dia milikuane ra luveana, 
Ma damana muka ra umana talaina dia vana vailik kan ia! I vila mur diat ma ra tinata, ma pata, dia tar vana ka. 
Nina i ongor upi ra kabinana i mari ra balana iat; Ma nina i balaure vake ra minatoto na tikan tadav ra boina. 
A tena varvai ba i tavir pa na pila ta ra varkurai, Ma nina ba i vatang ra vaongo na virua. 
Pa i topa ra lunga pi na lukalukara, Ma damana bula pa i topa tuna ra tultul ba na kure ra umana luluai. 
Ba tikai i matoto i vovovon ma ra kankan, Ma ra magit na gugu pirana pi na nur vue ra nirara. 
Ba ra king i kulot i da ra leon i kukukula, Ma ga kana varmari i da ra mavoko ta ra vura. 
Ba tika na bul i lunga i da ra magit na varmonong pire tamana, Ma ra varngangar kai tika na vavina i taulai i da ra pal i tuatua vatikai. 
A pal ma ra tabarikik da kale dir ta ra umana tama i dat, Ma ra Luluai iat i tul tar ra vavina ta dat, a tena kabinana. 
A mangamangana tabauma i vuna ba da tarurungai, Ma ra tena talanguan na ti malari ma ra mulmulum. 
Nina i toratorom ta ra vartuluai i balaure kana nilaun iat; Ma nina ba pa i mataure kana vinavana na virua ka. 
Nina ba i mari ra umana luveana i la tar ra magit tai ra Luluai, Ma ra Luluai na bali boko kana bo na mangamangana. 
Una virit natum a tutana, tago kan na boina tana; Ma koko una bala upi kana vinirua. 
A balakadik na varkul boko. Tago ona u varporong ure, una pait mule. 
Una valongore ra tinata na varvateten, ma una kapupi ra varpit, Upi una kabinana ta ra mutuaim. 
A tarai dia abe pa mangoro na magit ta ra bala i diat, Ma ra nuknuk i ra Luluai na tur vatikai. 
A magit di mainge ta ra tutana ia ra varmari, Ma ra luveana i boina ta dir ma ra tena vartuam. 
A variru tadav ra Luluai i papait na vatavua ra nilaun; Ma nina ba i vatur vake na ti maur vatikai; Pa ta kaina magit na tadav ia. 
A tabauma i vung ra limana ta ra la, Ma pa i tak vaarike mule pi na tulue ta ra ngiene. 
Una luba ra tena varkulumai, ma ra tuptup na tutana na matoto tana; Ma una pit nina i kapa ra nuknukina, ma na gire ilam ra kabinana. 
Nina i vakaina tamana, ma i okole vue nana, Ia ra bul ba i vuna ta ra niruva ma ra vavirvir. 
Natugu, una ngo kan ra valavalongor ta ra varvateten Ona u mainge ke ba una vana irai kan ra tinata na kabinana. 
A tena varvai vakuku i kulume ra varkurai, Ma ra ngie i ra kaina tarai i konom pa ra kaina magit. 
Di vaninare ra umana varkurai ure ra umana tena varkulumai, Ma ra umana mememene ure ra tamuru i ra umana lunga.