Buki Pilabumaboma Kabutubogwa Deli Kabutuvau ISIKELI 1

ISIKELI
La Buki

Kabovitouula

Omitibogwa mina Babiloni si tokwabilia eiyoulisi Yerusalem wa taitu 586 BC. Ikatupipaisi mimilisi tomota e ilauwaisi mapilana Babiloni. E taitala tokatupipi isisu deli mabudona, matauna yagala Isikeli. E matauna tovitoubobuta goli.

Isikeli eitovitoubobuta baisa budoyu boda. Budotala mina Isireli baisa matausina mina Babiloni eikatupipaisi eilauwaisi mapilana Babiloni. E buduyuwela mabudona kesala mina Isireli isisuaisi wala Yerusalem.

Mapilana Isikeli la buki isim katupwaila katupovasi. (1) Tomota kasi katuloluta paila Yaubada la kamwaga deli paila Yerusalem kala katudidaimi. (2) Mimilisi biga metoya Guyau paila boda ituwoli ituwoli kasi kamwaga, mabudosina goli eilamidadaisi eikididogaisi la tomota. (3) Bigala visimoli paila mina Isireli igau Yerusalem eikapusi, deli goli biga katotila paila tuta igau bima mina Isireli bibodaisi kasi kwala. (4) Isikeli ivituloki kala gigisa Bwala Kwebumaboma kala vigavau deli goli kasi vigavau mina Isireli.

Isikeli matauna la dubumi saina peula, deli saina toninitalapula. Mimilisi tuta bililivala paila uula eigisi kilisala, e mimilisi tuta biuvituloki paila nanola Yaubada deli kavisakila. Matauna Isikeli iluki mina Isireli kidamwa ibodi wala ninasi deli bilomasi bivigivauwaisi; ilivala kidamwa tomota taitala taitala la mitugaga kala pakula titoulela. Tuvaila ikamituli la pikwaku paila igau Yaubada bivigivau mabudona mina Isireli. E matauna gala tovitoubobuta wala, mitaga tuvaila matauna tolula, mauula ininanamsa peula paila Bwala Kwebumaboma deli avai bubunela bibodi tomota bitobumaboma.

Buki kala katumimisa

Isikeli kala dou 1.1—3.27

Yerusalem kala katudoum bigala 4.1—24.27

Yaubada ikaibiga boda ituwoli ituwoli kasi kamwaga 25.1—32.32

Yaubada la biga katotila baisa la tomota 33.1—37.28

Vitoubobuta paila matauna Gogi 38.1—39.29

Kilisala mwada igau bikaloubusi Bwala Kwebumaboma deli valu vilouvau 40.1—48.35

Isikeli igisi kilisala kwaimatala paila Yaubada

(1.1—7.27)

Yaubada la takaikaia

1 Olopola taitu kweluwotolula, navasila tubukona e kwailimela kala yam, yeigu Isikeli tolula e Busi latula yeigu, asisu deli mabudona mina Yudia tokwatupipi mapilana Babiloni opapala Waya Keba. E labuma ikapogega e agisi kilisala Yaubada. 2 (Tuta makwaina eiboda kwailimela taitua guyau Yeoyakini eisisu okatupipi.) 3 E asisu mapilana Babiloni opapala Waya Keba, e alagi Guyau eibigatona baisa yeigu deli alumkoli la peula.

4 E akowana wala ogawata e agisi utuyagila leima metoya opiliyavata. Kavikavila ikavikavila metoya pilatala lowalowa saina vakaigaga, e visigala ivisigili labuma. E ambaisa eikavikavila, kwaitala vavagi ivivivila makawala barasi. 5 E oluwalela makwaina utuyagila, agisi kwaitala vavagi kala gigisa makawala navasi bubuli nammomova e kasi bububula makawala tomota, 6 mitaga natana natana minasina migila kala bawa kwaivasi, deli pinupanela pilavasi. 7 E kaikesi kwayaduwosisiasi wala, deli kwaibakwaisi makawala kwaibakwaila bulumakau. E makweyasina kwai ivivivilasi makawala barasi bogwa kala katumigileu. 8 E natana natana iboda kwaivasi migila, pilavasi pinupanela, deli tuvaila natana natana yamala kweyavasi makawala tomota yumasi, kweyatala kweyatala isisu osikowala pinupanesi pilatala pilatala. 9 E bubuli minasina itoulasi e natana natana iyosokani pilayu pinupanela e bilokaia bikabikoni matala sala pinupanesi. E minasina avai tuta bililoulasi, biloulasi budotala wala e gala bikaiki uwosi tovila.

10 E natana natana minasina migila kwaivasi ituwoli ituwoli. omatala isisu tomota migila, ola kakata isisu laiyoni migila, ola kikiwama isisu bulumakau migila e otuboulola mluveka migila. 11 E natana natana iyosokani pilayu pinupanela e bilokaia bikabikoni matala pinupanesi sala minasina okaipapala, e pilayuga tuvaila pinupanesi ikatununumasi wala ima ouwosi. 12 E nammomova natana natana migila kwaitala bila opiliyavata, kwaiyuwela bila opilibolimila, kwaitolula bila opilikwaibwaga e kwaivasila bila opilibomatu, e mapaila boda makwaina igagabila bilosi ambaisa wala magisi bilosi, e gala wala bikaiki uwosi tovila.

13 E oluwalaisi minasina nammomova itotu kwaitala vavagi kala gigisa makawala kaitala kaidagi kailululu e immotatina goli. E kova bilulu, e tutala kova bisubeilulu kavikavila bisunapula. 14 E nammomova minasina saina nanakwa bititowaisi bititomaisi makawala kavikavila.

15 Igau wala lagigisi minasina navasi nammomova, e agisi kwaivasi wiri bogwa eitolisi opwaipwaia, e kwaitala kwaitala wiri opapala minasina natana natana. 16 E kwaivasi wala makwaisina wiri makawala wala kasi gigisa, e komwaidona ivivivilasi makawala kwaitala dakuna saina mwau mapula. Tuvaila kwaitala kwaitala makwaisina wiri itotusi, e kwaiyuwela wiri itowalaiyaisi wala sesia itobubotaisi si kaitotu, 17 e wiri makwaisina ibodi wala bisakaulokaisi mitasi deli tuboulosi, okakata deli goli okikiwama. 18 Deli wiri makwaisina kaipagasi komwaidona wala matilawokuva. 19 E avai tuta wala nammomova minasina biloulasi e wiri makwaisina bitavinasi wala deli minasina. E kidamwa nammomova minasina biyowasi metoya opwaipwaia e bilosi walakaiwa, wiri makwaisina makawala wala bivagaisi. 20 Kidamwa minasina nammomova bilosi ambaisa wala magisi, e wiri makwaisina bivagaisi makawala wala avaka nammomova minasina eivagaisi, paila minasina nammomova ipwalovaisi makwaisina. 21 E avai tuta minasina nammomova biloulasi kaina bitolisi kaina biyowasi walakaiwa, e wiri makwaisina bivagaisi makawala avaka bogwa minasina leivagaisi.

22 E odubasi minasina isisu kwaitala vavagi kala gigisa makawala kaitala kailuya iteyasi metoya dakuna kwevivivila kala mimilakatila makawala kauniwavila obolita. 23 E minasina itotusi osikowala kailuya makaina, e natana natana bikatuvakavi pilayu pinupanela bilokaia minasina okaipapala, e pilayu pinupanela tuvaila paila bitabodi wowola. 24 E yeigu alagi butula pinupanesi avai tuta eikatupapapasi biyowasi gulitinidesi, kala lega makawala kaisai bikawoula obolita, kaina makawala budotala budoveka tokwabilia si mowai, kainaga makawala kaigala Yaubada Topeuligaga. Avai tuta isimwaisi yoyowa, minasina ikatupwaisi pinupanesi, 25 mitaga tuvaila wala butula imaima metoya odabala kailuya makaina isisu odubasi minasina nammomova.

26 E odabala kailuya isisu kwaitala vavagi kala gigisa makawala kwaitala takaikaia eikamdokaisi metoya kwaitala dakuna kwevivivila yagala sapayab e otakaikaia makwaina isisu kububʹula tomota, kala gigisa makawala taitala tau. 27 E kububʹula tau matauna ivivivila makawala tanumnumta barasi bivivivila wa kova. E makwaina isimitali komwaidona ambaisa ambaisa deli kala lumalama saina visigala, 28 e olumoulela isisu komwaidona kala vau lubakaidoga. E baisa lumalama saina guyugwayu iyomitali Guyau toguyugwayu.

Yaubada idou Isikeli bimila tovitoubobuta

Avai tuta lagisi baisa, akapusiki wala matagu ala opwaipwaia. Oluvi alagi kaigatala kaigila.

1:1 1.1 YG 19.11

a1:2 Taitu makwaina 593 BC.

1:2 1.2 2 Gwe 24.10-16; 2 Lil 36.9-10

1:5 1.5 YG 4.6

1:10 1.10 Isi 10.14; YG 4.7

1:13 1.13 YG 4.5

1:15 1.15-21 Isi 10.9-13

1:18 1.18 YG 4.8

1:22 1.22 YG 4.6

1:24 1.24 YG 1.4-15; 19.6

b1:26 Makwaina dakuna sapaya saina mwau mapula kala vau makawala tilibwabwau. Kugisi makasana Biga Kala Katumiki.

1:26 1.26 Isi 10.1; YG 4.2-3

1:27 1.27 Isi 8.2