1 Avai tuta bukusili bukukwamsi som taitala todabala, kuvitusi availa matauna. 2 Kidamwa togugoveka yoku ibodi bukuninalem titoulem. 3 Gala bukugugoveka paila kalamatabwaila eikatubiasi; paila kaina matauna eivigikoni mwada bisinapwaim.

4 Ibodi bukukwabitam bibwaina, e taga bikaiki wowom kala savali guguwa bidubadu. 5 Kaina m guguwa kala wokuva saina nanakwa sainela, makawala goli isim pinupanela biyowa bila makawala mluveka.

6 Gala bukukwamsi kamitaiyu tau matauna tokikila kaina bukugugoveka paila kalamatabwaila eikatubiasi. 7 Matauna bilukwaim kawala, “Mwa, kukwam tuvaim,” mitaga gala nanola makawala. Ka, avaka idoki titoulela onanola, baisa goli la bubunela mokwita. 8 Igau bukulagobi avaka bogwa lokukoma, e komwaidona m yakaulubwabwasi gala wala dimlela.

9 Gala bukuyomadi m bigabwaila baisa matauna tonagowa; paila gala wala bikabwaili m bigatona.

10 Gala avai tuta bukukobili kaitala kaibogwa tokulumwala kaina bukuyouli si pwaipwaia matausina wailova. 11 Paila Guyau Topeuligaga matauna kasi taboda, e deli bipii matausina e bikagagaimga.

12 Kumanum baisa kam tovituloki e bukutakutu komwaidona avaka bukulagi.

13 Gala bukuninayuwa paila bukuvituloki latum. Kidamwa bukuvituloki wa lewa galaga bikaliga. 14 Mitaga ka, kala siligaga sainela kidamwa vituloki makwaisina kaina bikoli la momova.

15 Latugu kidamwa bukukwabitam e yeigu saina bamwasawa. 16 E ulo mwasawa bikalisau avai tuta balagaim bukulilivala deli m kwabitam.

17 Gala bikau nanom tomota tomitugaga; mitaga kutemmali Guyau e baisa bivigaki uulela m sisu. 18 Kidamwa bukuvagi makawala, e tuta oluvi bukuyubwaila.

19 Latugu, kunakaigalaigu! Ibodi bukukwabitam e nanom bisakauloki ammakawala m kwaisisu. 20 Gala bukuvakatu tomota matausina saina tomomom waini kaina togugoveka. 21 Paila tomomom sainela deli togugoveka igau bigweiluvasi. Kidamwa bukuyokulokaim kamkwam wala deli masisi, e tuta pikekita bukusikam yadidadaimi wala.

22 Kunakaigali tamam la biga, paila kidamwa gala matauna, yoku gala tomota. Avai tuta inam binumoya, kukwamiabi minana.

23 Makwaisina kamokwita, kabitam, kamitabubula deli nikoli, ibodi bukudoki veiguwatoula, e saina mwau availa bigimolivau metoya baisa yoku.

24 Matauna tomitukwaibwaila ivigaki tamala la mwasawa. Ibodi bikavisi latula kidamwa matauna tokwabitam.

25 Kuvigaki tamam deli inam bikavisaimsi. Ibodi inam bibani mwasawa makwaina.

26 Latugu, kulamam e bukunakaigalaigu, deli ibodi bukuvitusi ulo kidakeda. 27 Minasina nakalimwala deli nakakailasi baisa isisu sikulela kaliga. 28 Minasina bititobogwasi wala paila yoku makawala tolibulebu, e bivigakaisi bidubadu tauwau biyogagaisi si kaukweda.

29-30 Kuvitulokaigu availa tomomom siligaga, availa idoki bivigikoni mimilisi kaiuwovau kaimomom, e igau yeigu balukwaim ammakawala matauna la sisu gewagewa deli kala lumkola gaga deli la ninamwau. Tuta komwaidona iyomituli pakula deli la takulukulu. Matala kwebubweyani deli kala lewa manosina mwada ibodi biyobwi, bogwa eikatubwauwaisi wowola. 31 Gala bikau nanom waini, kaina goli kala gigisa saina bweyanigaga, deli bivivivila wa viga e saina manum bisalili wa kailia. 32 Mitaga igau biyam kaukwau bukulumkoli makawala natana keiyuna yayanela bogwa eigadaim. 33 Matam bibiliuya e gala igagabila bukunanamsa kaina bukulivala duwosisia. 34 Igau bukulumkoli makawala okusisu omilaveta, e eiwaiwaim kaisai wa waga, e ibulokatuwolaim. 35 E bukulivala kawam, “Kaina goli avaka bogwa leiwaigu! Kaina goli eigimsisaigusi mitaga gala wala aluluwai! Avaka paila gala igagabila bamamata? Ibodi magigu bamom tuvaila.”