7
Mina Isireli kasi bawa 144,000
1 Oluvi agisi taivasi anelosi itotusi ovalu watanawa wokulula kwaivasi okwaibwaga, oyavata, obomatu, obolimila. Ikikulotaisi makwaisina yagila kwaivasi mwada taga avai yagila biuu odabala pwaipwaia kaina obolita, kaina baisa avai kai. 7.1 Yer 49.36; Dan 7.2; Sek 6.5 2 E agisi taitala anelosi tuvaila opilibomatu leima, iiyosi la kabutuvatusi Yaubada Tosivagasi. E kaigala kaigaveka idou baisa matausina anelosi taivasi, matausinaga Yaubada leikasali si karaiwaga biyogagaisi pwaipwaia deli bolita. 3 Anelosi ikaibiga, kawala, “Taga bukuyogagaisi pwaipwaia kaina bolita kaina avai kai, igau bitaginisi kasi kabutuvatusi da Yaubadasi la towotetila odubasi.” 7.3 Isi 9.4,6 4 E leilukwaigusi avaka kasi bawa matausina leiginisi Yaubada la kabutuvatusi odubasi. Kasi bawa goli 144,000 mina Isireli metoya dalesi dilatala dilatala. 5-8 E dilatala dilatala kasi bawa 12,000 eiginisi kasi kabutuvatusi. E madilasina yagasi Yuda, Rubeni, Gadi, Asera, Napitalai, Manasa, Simioni, Libai, Isaka, Sebuloni, Yosepa, e Beniamina.
Tomota saina bidugaga
9 Oluvi agisi e ka! tomota saina bidugaga, gala gagabila bitakalau kasi bawa. Matausina metoyasi ambaisa ambaisa, valu, dala, tomota, deli bona. Itotusi omatala takaikaia deli omatala matauna Lam, eisikamsi kasi kakapula yapupwakau e iiyosisi sisila pulopola oyumasi. 10 Idousi kaigaveka, kawasi, “Bogwa tabanaisi katumova metoya baisa da Yaubadasi matauna isisu otakaikaia deli metoya baisa matauna Lam.” 11 Anelosi komwaidosi itoulaisi makwaina takaikaia, deli tummoya deli minasina navasi nammomova. Oluvi itapopulasi ikavaginasi omatala takaikaia, itapwarorusi baisa Yaubada, 12 kawasi, “Emeni! Ibodi kala kavisi, kala yakaula, kala nikoli, kala nokagutoki, kala kamaiaba, la peula, la karaiwaga da Yaubadasi bikanigaga goli. Emeni!”
13 E taitala matausina tommoya ikatupoiyaigu, kawala, “Availa matausina leisikamsi kasi kwama yapupwakau, deli ammetoyasi leimaisi?” 14 E kawagu, “Eisekila tomoya; yoku kunikoli.” E ilukwaigu, kawala, “Baisa matausina eibodaisi tuta makwaina lamadada sainela, e leipeulasi. Eiwinaisi kasi kwama iyapupwakau obuyavila Lam. 7.14 Dan 12.1; Md 24.21; Mk 13.19
15 Baisa uula itotusi omatala la takaikaia Yaubada
e iwotitalaisi matauna yumyam bugibogi ola bwala kwebumaboma.
E matauna isisu otakaikaia bivakawoli matausina titoulela.
16 Gala tuvaila bibanaisi molu kaina daka;
gala tuvaila bikali kalasia,
kaina kubowala avai yuviyavi. 7.16 Ais 49.10
17 Paila Lam matauna eitotu odabala takaikaia bimila toyamata sipi baisa matausina,
e bivakadi matausina wa sopi yeluyelu.
E Yaubada bikimadi mitiligisi e bivisimoli.” 7.17 Sam 23.1,2; Ais 25.8; 49.10; Isi 34.23